Azərbaycanda dövlət borcunun əsas məbləğinin qaytarılması üzrə ödənişlər cari büdcə ili ərzində cəlb edilən dövlət borcalması hesabına təmin edildikdə, bu ödənişlərin həmin ilin dövlət büdcəsində dövlət borcuna xidmət edilməsi ilə bağlı nəzərdə tutulan xərclərdən artıq olan hissəsi dövlət büdcəsinin xərclərinə aid edilməyəcək.

Trend-in məlumatına görə, bu məsələ Milli Məclisin İqtisadi siyasət, sənaye və sahibkarlıq komitəsinin bu gün keçirilən iclasında müzakirəyə çıxarılan “Dövlət borcu haqqında” qanuna təklif olunan əlavə və dəyişiklərdə öz əksini tapıb.

Bundan başqa, qanundakı “Dövlət büdcəsinin tərkibində məqsədli büdcə fondu” anlayışı “hüquqi şəxs yaratmadan təsis edilmiş büdcədənkənar dövlət fondu” ilə əvəzlənir.

Həmçinin, qanuna təklif olunan əlavəyə görə, Dövlət borcu və öhdəliklərinin Təminat Fondunun xərclərinin yuxarı həddi həmin fondun büdcə ilinin əvvəlinə olan qalığından və il ərzində mədaxil olunacaq vəsaitin cəmindən yuxarı ola bilməz.