Soçi görüşündən sonra maraqlı hadisələr baş verir. Həmin görüşdən sonra Qarabağdakı separatçıların əski parçaları və Ermənistanın bayraqları yığışdırılır.
Belə ki, dünəndən etibarən İrəvanın tələbi ilə separatçıların mövqelərində, habelə binaların üzərində asılmış bütün Ermənistan bayraqları, habelə separatçılara məxsus əski parçası yığışdırılmağa başlanaılıb. Erməni mediası yerli hökumətə istinadən yazır ki, buna səbəb Soçidə Azərbaycan tərəfinin tələbidir. “Azərbaycan Prezidenti Soçidə birmənalı qaydada bəyan edib ki, əgər Ermənistan və Qarabağ bayraqları yığışdırılmasa, bunu məcburi qaydada həyata keçirəcəklər. Hətta bayraq asılan bütün mövqelər atəşə tutulacaq. Ermənistan hökuməti görüşdən dərhal sonra bu barədə göstəriş verib və dünəndən etibarən bayraqlar yığışdırılıb”.
Bu gün isə daha bir maraqlı hadisə baş verib.Qarabağdakı separatçılar Bakıya rəsmi müraciət ediblər. Həmin məlumata görə, müraciət təbii qazla bağlı olub. Mənbə bildirir ki, erməni tərəfi Bakıdan bu qışdan çıxmaq üçün onlara təbii qaz verilməsini xahiş edib. “Qarabağdakı ermənilər Bakıya müraciət ediblər ki, qışdan çıxmaları üçün onlara təbii qaz versinlər. Hazırda Xankəndi və ətrafındakı məntəqələrdə evlərin qızdırılması, habelə əhalinin istifadə etməsi üçün “mavi yanacağa” ciddi ehtiyac var. Ona görə də, problemlərini həll etmək üçün Bakıdan kömək istəyiblər”.
Qeyd edək ki, uzun illər işğal altında olan torpaqlarımızda yaşayan ermənilərin qaz təhcizatını Ermənistan həyata keçirib. Lakin müharibədən sonra, xüsusən də Qafan-Gorus yolu bağlandıqdan sonra Ermənistanın özündə də ciddi sıxıntılar yaranıb. Rəsmi İrəvan bəyan edib ki, Rusiyadan alınan təbii qaz daxili təlabatı ödəmək üçün yetir. Bundan başqa, İrandan maye qaz və boru xətti ilə alınan qazın həcmində də azalma var. Buna səbəb qiymətlərin bahalaşması və logistika məsələsində yaranmış problemlərdir.
Qarabağda yaşayan ermənilərin bir başqa problemi də ondan ibarətdir ki, Ermənistandan Xankəndinə çəkilmiş qaz xətti də sıradan çıxıb. Belə ki, həmin kəmərin keçdiyi ərazilərin böyük hissəsi Ordumuz tərəfindən işğaldan azad edilib və xətlər də nəzarətimiz altına düşüb. Yeni qaz xəttinin çəkilməsi səbəbindən isə sözügedən qaz kəmərinin fəaliyyəti dayandırılıb. Nəticədə, elektrik enerjisi problemi ilə üzləşən separatçılar, müharibədən sonra təbii qaza olan təlabatını da ödəyə bilmir. Qafan-Gorus yolunda Azərbaycan nəzarət-buraxılış məntəqəsi qurmamışdan öncə İrandan Xankəndinə maşınlarla maye qaz daşınsa da, artıq xeyli müddətdir bu proses də dayanıb.
Rəsmi Bakının Xankəndidəki separatçılara hansı cavab verəcəyi barədə dəqiq məlumat yoxdur. Hətta bu mövzu ilə bağlı hər hansı açıqlama belə verilmir. Eyni zamanda, Azərbaycan hökuməti separatçıların təbii qazla bağlı müraciətinə müsbət və ya mənfi cavab verəcəyi barədə də hər hansı bir ehtimal mövcud deyil. Yəqin ki, bunun qarşılığında nələrsə tələb olunacaq.
jamaz.info
