İran televiziyasında qalmaqal: Xocalını görməzdən gəlib...

İran televiziyasında qalmaqal:  Xocalını görməzdən gəlib... backend

İranın dövlət televiziyasında son günlər gərginləşən Azərbaycan-İran münasibətlərinə həsr olunmuş verilişdə qalmaqal yaranıb.

Qazilər.az Musavat.com-a istinadən xəbər verir ki, “Ecoiran” verilişində iranlı siyasi və iqtisadi təhlilçi Azərbaycanın iranlı yük maşını sürücülərindən rüsum almasını qanunsuz adlandırıb. O, Azərbaycanın İranın ərazi bütövlüyünü müdafiə etmədiyini, körfəzdə 3 adanın İrana məxsus olması ilə bağlı açıqlama vermədiyini bildirib.

"Buna görə də Azərbaycanın torpaqlarının işğal olunmasının İrana aidiyyəti yoxdur", - deyə o bildirib.

Təhlilçinin bu çıxışını verilişə onlayn qoşulan İranın Azərbaycandakı keçmiş səfiri Əfşar Süleymani etirazla qarşılayıb. Səfir təhlilçinin iddialarını əsassız sayıb, onun arqumentlərinin İranın konstitusiyasına belə zidd olduğunu deyib.

“Necə olur ki, dünyanın o biri başında müsəlmanların hüquqlarını müdafiə etdiyinizi iddia edir, özünüzü islam dünyasının mərkəzi adlandırırsınız, ancaq ermənilərin ölümünə ürək yandırdığınız halda azərbaycanlıların qətliam edilməsinə reaksiya vermirsiniz? Xocalıda baş verən soyqırımı görməzlikdən gəlib, bunu və azərbaycanlıların öz torpaqlarından çıxarılmasını məhkum etmirsiniz”, - deyə, keçmiş səfir bildirib.

Təhlilçinin “biz Xocalı soyqırımında və 90-cı ilərdəki hadisələrdə Azərbaycanı himayə etmişik” iddiasını absurd adlandıran Əfşar Süleymanı deyib ki, İranın Azərbaycanı himayə etməsi barədə iddialarla bağlı heç bir fakt yoxdur.

Qeyd edək ki, xüsusilə son günlər Azərbaycanla bağlı mövqeyinə görə Əfşar Süleymani İran mətbuatının və radikal cərəyanların hədəfinə çevrilib.

Bir neçə gün öncə Əli Xameneinin nəzarətində olan və SEPAH-la ETTELAAT-ın mövqeyini əks etdirən “Keyhan” qəzeti Əfşar Süleymanini “Azərbaycanın beşinci kolon”u adlandırıb, onun fəaliyyətinin araşdırılmasını və barəsində ölçü götürülməsini tələb edib.

loading...
Aydinyol.az