İyulun 13-ü və 15-də Azərbaycan Ordusunun Şuşa şəhəri ətrafındakı mövqeləri atəşə tutulub. Müdafiə Nazirliyi atəşi Rusiya sülhməramlılarının nəzarətində olan ərazidəki qanunsuz erməni silahlı dəstələrinin açdığını bəyan edib.

Novator.az-ın məlumatına görə, Respublikaçı Alternativ Partiyasının Siyasi Komitəsinin üzvü Natiq Cəfərli yazır ki, Şuşa istiqamətində atəşkəsin pozulması Rusiyaya rəsmi nota verilməsini zəruri edir: “Notada bölgədəki Rusiya “sülhməramlılarından” başqa əlində silah olan hər kəsin terrorçu olduğu, dərhal məhv ediləcəyi bildirilməlidir. Kreml imzasına hörmətlə yanaşıb erməni silahlılarını özü ləğv etməli, ya da Azərbaycan öz ərazisində antiterror əməliyyatına start verməlidir.

Rusiya-Türkiyə Monitorinq Mərkəzinin işi də anlaşılan deyil, bu qurum atəşkəsin dəfələrlə pozulması fonunda hələ bir dəfə də olsun kəskin mövqe ortalığa qoymayıb”.

Ermənistan 1988-1994-cü illərin təcavüzündə Azərbaycanın bütün cənub-qərbini ələ keçirib.

2020-ci il sentyabrın 27-dən Azərbaycanın apardığı hərbi əməliyyatlarda ərazilərin böyük hissəsi azad olunub.

Noyabrın 10-na keçən gecə Azərbaycan prezidenti İlham Əliyev, Ermənistanın baş naziri Nikol Paşinyan və Rusiya prezidenti Vladimir Putin birgə bəyanat imzalayıb. Hərbi əməliyyatlar dayandırılıb, Yuxarı Qarabağa və Ermənistana gedən Laçın yoluna Rusiyanın sülhməramlı kontingenti yerləşdirilib.

Dekabrın 1-dək ərazilərin daha bir hissəsi Azərbaycana qaytarılıb.

Xankəndi, Xocalı, Ağdərə, Xocavənd şəhərləri, Şuşa, Xocalı, Xocavənd rayonlarının və keçmiş Ağdərə rayonunun bir hissəsi işğalda qalır.

Laçın şəhəri və rayonun 6 kəndi Rusiya Ordusu bölmələrinin əlindədir.

2021-ci il yanvarın 30-u Ağdam rayonunda Türkiyə-Rusiya Birgə Monitorinq Mərkəzi açılıb. Qurum atəşkəsə nəzarət edir.

10 noyabr 2020-ci il bəyanatına görə, Rusiyanın sülhməramlı kontingenti erməni silahlı qüvvələrinin çıxarılması ilə paralel şəkildə yerləşdirilməli idi. Ancaq Azərbaycanın nəzarətindən kənar qalan ərazilərdə erməni silahlı qüvvələri var.