ABŞ və Rusiya prezidentləri Co Baydenlə Vladimir Putin arasında geniş tərkibli və məhdud tərkibdə baş tutan görüşlər fasilə də daxil olmaqla 4 saat yarım davam edib.

Qazilər.az xarici KİV-ə istinadən xəbər verir ki, iki liderin Cenevrə gölünün sahilindəki "Villa La Grange" sarayında görüşü yerli vaxtla saat 5-də başa çatıb, bir qədər sonra isə Putinin mətbuat konfransı başlayıb.

Görüş zamanı hər iki lider arasında ilkin razılaşmalar əldə olunub. Belə ki, V.Putin məsləhətləşmələr üçün geri çağırılan ABŞ və Rusiya səfirlərinin yenidən vəzifələrinin icrasına başlaması ilə bağlı Baydenlə razılaşma əldə edildiyini açıqlayıb.

Bundan başqa, Rusiya lideri amerikalı məhkumların ölkələrinə təhvil verilə biləcəyini də bildirib.

"Bayden ilə kibertəhlükəsizlik sahəsində məsləhətləşmələrə başlanılması ilə bağlı razılaşdıq. Bu çox vacibdir", - deyə V.Putin əlavə edib.