Ötən ay AŞPA-nın sessiyasında “Türkiyənin Suriyaya hərbi müdaxiləsi” mövzusunda keçirilən müzakirələrdə Azərbaycan nümayəndə heyətinin üzvü, Milli Məclisin deputatı Qənirə Paşayevanın Azad Demokratlar Qrupu adından çıxış etməsi Türkiyə mediasının gündəmindən düşmür.

Axar.az xəbər verir ki, bu dəfə də Türkiyənin "Taymtürk" xəbər portalı Qənirə Paşayevanın çıxışını dərc edib.

Qeyd edək ki, regional və beynəlxalq sülhün və təhlükəsizliyin qorunub saxlanması üçün terrorizm təhlükəsinin aradan qaldırılmasının vacibliyinə toxunan deputat qurumu terrorla mübarizədə Türkiyəyə dəstək göstərməyə çağırıb. O, Türkiyə-Suriya sərhədindəki regionlara səfər etdiyini, qaçqın düşərgələrində olduğunu, terror təşkilatlarının birbaşa hədəfi olan insanlarla söhbət etdiyini bildirərək deyib: “Bu insanlar Avropa Şurasından dəstək gözləyirlər. Avropada insan haqlarının qoruyucusu olaraq AŞPA bu insanlıq faciəsinə diqqət yetirməlidir. Türkiyə Avropa Şurasının təsisçi-üzvü olaraq öz vətəndaşlarının təhlükəsizliyini təmin etmək və terrordan əziyyət çəkmiş mülki vətəndaşların fundamental hüquqlarını qorumaq məqsədilə addımlar atıb. Bu kontekstdə Türkiyə hərbi qüvvələrinin “Zeytun budağı” adı altında həyata keçirdiyi əməliyyatlar Türkiyənin sərhəd təhlükəsizliyini təmin etmək, regionda terror təhlükəsini neytrallaşdırmaq və bununla da regionda yaşayan mülki vətəndaşları terror hücumlarından və hədəflərindən qorumaq məqsədi daşıyır”.

Qənirə Paşayeva qeyd edib ki, “Zeytun budağı” əməliyyatı Türkiyənin beynəlxalq hüquqdan irəli gələn hüquqlarına uyğun olaraq başlanılıb. BMT-nin terrorizm əleyhinə bir sıra qərarları və BMT Konvensiyasının özünümüdafiə hüququnu nəzərdə tutan 51-ci maddəsi Türkiyənin müdaxiləsinə haqq qazandırır. Suriyada PYD/YPG-nin məqsədi İŞID-a qarşı mübarizə aparmaq deyil, əraziləri işğal etmək və öz xeyrinə demoqrafik statistikanı dəyişməklə beynəlxalq ictimaiyyəti fakt qarşısında qoymaq idi. Türkiyə YPG və İŞID tərəfindən həyata keçirilən terror hücumlarından çox əziyyət çəkib. Bu terror hücumları çoxlu sayda günahsız insanın ölümünə səbəb olub. “Ümid edirəm ki, Türkiyənin həyata keçirdiyi əməliyyat Suriyanın şimalına sülh və sabitlik gətirəcək və regionda yaşayanlar yenidən terror hücumlarına məruz qalmayacaqlar”, - deyə deputat bildirib.

">