Təqribən bir 50 manat da belə getdi... "Barselona”nın formasını geyinən oğlanı uzaqdan görəndə qara günümü qablaşdırmışdım. Saqqız çeynəyən, ədabaz yerişli bu gənc salamı da elə verdi ki, verməsəydi bəlkə ondan yaxşı idi. Əlindəki yekə dəvətnaməni masanın üstünə qoyub otaqdan çıxdı.
Sözün açığı, bir neçə dəqiqə dəvətnaməni açmağa cürət eləmədim. Ötən həftə iki gün dalbadal belə dəvətnamə gətirmişdilər. 30 il əvvəl mənimlə eyni gündə əsgər andı içən, bir həftə sonra başqa hərbi hissəyə göndərildiyindən daha heç vaxt üzünü görə bilmədiyim birisi qardaşı oğlunun kor bağırsağından uğurlu əməliyyatının birinci ildönümü münasibəti ilə təşkil olunan ziyafətə dəvət edirdi. İkinci dəvətnaməni gətirənin özü xeyli izahat verməli oldu. Çox çətinliklə də olsa xatırlaya bildim, 26 il əvvəl işlədiyim redaksiyaya sürücülük vəsiqəsinin itməsi ilə bağlı elan gətirmişdi. Bacısı oğlu qarmon kursunu uğurla bitirdiyindən 500 nəfərlik mərasim təşkil edib, ailəsi üçün əlamətdar olan belə bir gündə məni də həmin ziyafətdə görməyi arzulayır."Barselona” formasındakı oğlanın gətirdiyi dəvətnaməni açmazdan öncə son günlər avtobusda yol getdiyim, ayağını tapdaladığım insanları bir-bir gözümün qabağına gətirdim. 55-ə qədər sayıb nəhayət dəvətnaməni açdım. Pah!
Dünya futbolunun ulduzu məni öz toyuna çağırırdı! Məni uzaqdan-yaxından tanıyanlar bilir ki, 18 ildi "Şərurspor”un fanatıyam, amma vaxt tapanda "Barselona”nın oyunlarını televizordan izləyirəm. Bu İspaniya klubunun da matçlarını izlədin, Messinin oyununa heyran olmadınsa heç nə. Elə bil yarpaq dolması yemisən yanında sərin qatığı olmayıb...
Messi mənim ona televizordan maraqla baxdığımı yəqin ki, hiss edib, ona görə də toyuna dəvətnamə göndərib. Başqa cür necə ola bilər ki? Əsgər yoldaşım olmayıb, avtobusda ayağımı tapdamayıb... Dəvətnaməni almaq, risk edib açmaq və açıb içini oxumaqla iş bitmir axı. İyunun 24-ə kimi ən azı 50 manat tapmaq lazımdı. Getməmək üçün bəhanə axtarmağın yeri yoxdu, ha tərəfdən baxsan Lioneldən ayıbdı. Ronaldonu, Beyli, Kərim Benzemanı yox, məni toya dəvət edib.
Amma öz aramızdı, Messinin toyu əməlli-başlı şou olar, belə maraqlı məclisi izləmək üçün 50 manat xərcləməyə dəyər məncə. Messinin dostları toy başlayan kimi "Bəy, bəy sağlığına, bəy Lionelin sağlığına!”-deyib qışqıracaqlar. Ədalət Şükürov "Ay qız, keçmə bizim məhlədən” mahnısını toya gələnlərə danışacaq. Aşıq Telli Borçalı "Barselona”nın baş mühasib müavinin qabağında bolluca burcudacaq. Növbəti dəfə təmirdən çıxan Rəqsanə əvvəlcə "Mən səni görmək istəsəm hara gəlim?” mahnısını oxuyacaq, sonra Suareslə selfi çəkdirib dostları ilə paylaşacaq. Yazacaq ki, mən xoşbəxt sənətkaram ki, dünyanın futbol ulduzu Maradona ilə şəkil çəkdirmişəm.
Üzeyir Mehdizadə oxumamışdan əvvəl şadlıq evinə tüstü buraxacaqlar, sonra özünün müğənni olduğuna inanan bu oğlan repertuarındakı "şedevrləri” qonaqlara təqdim edəcək:
Küləklər aldı qoynuna,
Sarıldım onun boynuna.
Özüm də bilmədim necə
Düşdüm həyatının oyununa...
Bəyin klub yoldaşları bu mahnıdan sonra ortaya düşüb bir oynayacaqlar ki, elə bil əzəli rəqibləri "Real”ı "Santiaqo Bernabeu” stadionunda məğlub ediblər. Səməd Səmədov gur səslə bəy tərifi deyəcək: "Gəlsin xələt versin bəyin komanda yoldaşı Neymar, gəlsin xələt versin müdafiəçi Pike”.
"Real”a dəyibdi "Barsa”nın oxu,
Gəlsin xələt versin İnyestanın var-yoxu.
Sonra boylayan-boylana Pikenin arvadı Şakiranı axtaracaq:
Bakıdan sonra gəlir Xırdalan,
Ay Şakira, sən də bir az qurdalan...
Təzə bəy Messinin necə futbol oynadığını planetin dörd bir yanında yaxşı bilirlər. Hər oyunda qol vura-vura bu zalım oğlu toya qədər artıq iki oğul da dünyaya gətirməyə vaxt tapıb. Messinin gədələri öz dədələrinin toyunda Elariz Məmmədoğlunun mahnılarına qol götürüb bəs deyincə oynayacaqlar. Çox istərdim ki, Messi də öz toyunda oynasın. Buralarda qiymətlərin bahalığı üzündən dükan-bazara girməli deyil. Mal əti 11 manat, qoyun əti 12 manatdı. Pomidor 4 manata satılır, canım sənə desin xiyar 1 manat 50 qəpiyə. Kartof 1 manat 20 qəpiyədi. Hələ mən utandığımdan toyuq ətinin, 100 qramlıq çayın, 800 qramlıq şəkər tozunun, yağın, pendirin qiymətini yazmıram.
Messi, onsuz da ordan-burdan düzəldib sənin toyuna 50 manat yazdıracam. Amma sən də yekə kişisən, öz toyunda oyna. Orda oyna ki, bəlkə biz tərəflərdə bir az ucuzluq oldu...
