Terrorçu təşkilatlar arasında da rəqabət gedir. Hansısa terror təşkilatı bir ölkədə qətliam törədirsə, digər terror təşkilatı rəqibindən və ya müttəfiqindən geri qalmamaq üçün başqa məkanda terror aksiyasi planlaşdırma həvəsinə düşə bilər. Bu, həm də maliyyənin kimə çatacağı ilə əlaqəlidir. Əl-Qaidə lideri Üsamə Ben Laden müxtəlif ölkələrdə real “nəticə” əldə edə bilən qrupları maliyyələşdirirdi. Misal üçün Üsamə Ben Laden 2001-ci ildə ABŞ-da terror planlaşdıran qrupun “nəticə” əldə edə biləcəyini yəqin etdikdən sonra planın reallaşması üçün həmin qrupa maliyyə ayırdı.
QAZILER.AZ Axar.az-a istinaden xəbər verir ki, bu barədə politoloq Elxan Şahinoğlu qeyd edib.
O bildirib ki, İŞİD-ə bağlı qrup Moskvada konset salonuna terror hücumu təşkil etdikdən iki gün sonra Sankt-Peterburqda böyük ticarət mərkəzi boşaldıldı:
“Böyük ehtimalla Rusiyanın kəşfiyyat xidmətləri həmin ticarət mərkəzinə də terror hücumunun mümkünlüyü barədə məlumat əldə ediblər. Moskvadakı terror hücumundan sonra Fransada da ən yüksək səviyyəli terror təhlükəsi elan olunub. Deməli, Suriya və İraqda ağır zərbələr alan terrorçu qruplar Moskvadakı terror hücumundan ruhlanaraq başqa ölkələrdə aksiyalar keçirmək üçün hərəkətə keçiblər.
Bu arada, Dövlət Təhlükəsizlik Xidmətinin Lənkəran Şəhər İcra Hakimiyyətinin başçısı Taleh Qaraşova qarşı terror plalnlaşdıran şəxsi həbs etməsi də diqqəti çəkir. DTX-nin yaydığı məlumatdan aydın olur ki, terroru planlaşdıran şəxs müxtəlif rayonlarda yaşayan şəxsləri də bu işə cəlb etməyə çalışıb. Bu, millət vəkili Fazil Mustafaya qarşı təşkil edilən terror hücumuna bənzəyir. Həmin hadisədə də terroru planlaşdıranlan müxtəlif şəxsləri bu işə cəlb etmişdilər, hətta içərilərində keçmiş polis zabitindən tutmuş keçmiş hərbçiyə qədər vətəndaşlarımız var idi. Lənkəran icra hakiminə qarşı terroru planlaşdıran qrup Azərbaycanın rayonlarında fərdi qaydada ingilis dili müəllimi kimi fəaliyyət göstərən xarici ölkə vətəndaşlarına qarşı da sui-qəsd həyata keçirməyi planlaşdırıb. Azərbaycan rayonlarında ingilis dilini öyrədən könüllülər əsasən ABŞ vətəndaşlarıdır. ABŞ-ın Sülh Korpusu Təşkilatının könüllüləri müxtəlif ölkələrdə olduğu kimi Azərbaycanın müxtəlif rayonlarında da ingilis dilini tədris edirlər. Onlar eyni zamanda özləri də Azərbaycan dilini öyrənilər. Fikrimcə, ingilis dilini tədris edən ABŞ vətəndaşlarına qarşı terror ideyası bunu həyata keçirmək istəyən şəxsə kənardan ötürülüb. Terror ümumi bəladır. Ancaq bəzi dövlətlər terror vasitəsilə hədəf seçidiyi ölkəyə qarşı istifadədən çəkinmirlər”.
