Kanadanın Monreal şəhərində fəaliyyət göstərən Monreal Kanada-Azərbaycan Cəmiyyəti ölkəmizin işğaldan azad edilmiş ərazilərində Ermənistan tərəfindən mina təhlükəsinin davam etdirilməsi ilə bağlı beynəlxalq ictimaiyyətə müraciət edib.
Diasporla İş üzrə Dövlət Komitəsindən Axar.az-a bildiriblər ki, Cəmiyyətin adından “Human Rights First” beynəlxalq təşkilatına və kanadalı parlamentarlara ünvanlanan bəyanatda Kəlbəcər rayonunun Seyidlər kəndi ərazisində arıçılıq fəaliyyəti ilə məşğul olan azərbaycanlı sahibkar Əliyev Sahib İsa oğlunun bu il iyulun 13-də mina partlayışı nəticəsində xəsarət aldığı barədə məlumat verilib.
Monrealda yaşayan azərbaycanlılarda dərin narahatlıq doğuran bu insident beynəlxalq hüquq norma və prinsiplərinə hörmətsizliyin açıq nümayişi kimi qiymətləndirilib.
Ermənistanın ölkəmizə qarşı törətdiyi mina terrorunun Azərbaycanın hərbi qulluqçularının və mülki şəxslərinin həyatını itirməsinə və ya yaralanmasına səbəb olaraq qaldığı bir daha diqqətə çatdırılıb. Mina təhlükəsinin keçmiş məcburi köçkünlərin öz doğma torpaqlarına qayıdışına, bölgədə həyata keçirilən bərpa-yenidənqurma işlərinə böyük əngəllər törətdiyi xüsusilə qeyd edilib.
Monreal Kanada-Azərbaycan Cəmiyyəti beynəlxalq ictimaiyyəti mina sahələrinin dəqiq xəritələrini ölkəmizə təqdim etməsi, BMT-nin Minalardan Təmizləmə Xidməti (UNMAS) kimi minalarla mübarizə aparan beynəlxalq təşkilatlarla çalışması üçün Ermənistana güclü təzyiq göstərməyə çağırıb. Eyni zamanda Azərbaycanın texniki yardımla və minatəmizləmə təcrübəsi ilə təmin olunmasının zəruriliyi bir daha vurğulanıb.
