44 günlük Vətən müharibəsində şəhid olan əsgər və zabitlərimiz adlarını ən yeni tariximizə qızıl hərflərlə yazdılar. Onların sırasında əslən Cəbrayıl rayonundan olan Murad Məmmədov da var.

Vətən müharibəsində Məmmədovlar ailəsindən iki igid döyüşüb - Murad və qardaşı Nurlan.

Murad Yusif oğlu Məmmədov 1995-ci il iyulun 12-də Sumqayıt şəhərində anadan olub.

Sumqayıt şəhəri 22 saylı orta məktəbi əla qiymətlərlə bitirən Murad, 2013-cü ildə Azərbaycan Texniki Universitetin Elektroenergetika Mühəndisliyi fakültəsinə daxil olub.

Ali təhsilini başa vurduqdan sonra, 2018-ci ilin iyul ayında hərbi xidmətə yola düşüb. Daşkəsəndə yerləşən N saylı hərbi hissədə Vətənə borcunu yerinə yetirib. Xidməti ərzində "AQS" üzrə yarışmalara gedib nəaliyyətlər qazanıb. 2019-cu ilin iyul ayında hərbi xidməti bitirib.

M.Məmmədov mülki həyata qayıtdıqdan sonra imtahan verib "Azərişıq"da işə düzəlib, mühəndis kimi fəaliyyətə başlayıb.

Murad idmana da böyük həvəs göstərirmiş. Uzun müddət cüdo ilə məşğul olub. Uşaq yaşlarından Türkiyənin "Qalatasaray" futbol klubuna azarkeşlik edib.

Vətən müharibəsi başlayandan bir neçə gün sonra - 2020-ci ilin oktyabrın 1-də orduya könüllü yazılıb. Həmin dövrdə qardaşı Nurlan artıq döyüşlərdə iştirak edirdi.

M.Məmmədov Füzuli, Cəbrayıl, Qubadlının düşmən tapdağından azad olunması üçün döyüşüb. Oktyabrın 26-sı Qubadlının azad olunması uğrunda gedən döyüşlərdə qəhramancasına şəhid olub.

Allah rəhmət eləsin!