Dağlıq Qarabağ separatçı rejimində baş verən “rəhbər” dəyişikliyi işğal altında olan bölgədə müəyyən fəallıq yaradıb.

Yeni “lider” Azərbaycanın zəbt edilimiş ərazilərində müəyyən obyektlərin tikintisini, eləcə də digər məskunlaşma tədbirlərini genişləndirməyi nəzərdə tutan fikirlər səsləndirib.

Belə şəraitdə Azərbaycan Ordusunun düşməni narahat edən addımlar atması, geniş hərbi əməliyyatlar olmadan belə işğalçı qüvvəyə hansısa təzyiq göstərməsi haqlı olaraq cəmiyyəti düşündürür.

Lakin bəzi ekspertlər hesab edirlər ki, bu, paraktiki baxımdan o qədər də real görünmür.

“İlk növbədə onu vurğulayım ki, bü gün dünyada ikili standartların olduğu göz önündədir. Dağlıq Qarabağ bütün dünya dövlətləri və beynəlxalq qurumlar tərəfindən Azərbaycanın ərazisi kimi qəbul edilir. Dağlıq Qarabağın separatçı rejiminin həyata keçirdiyi heç bir siyasi tədbir rəsmi olaraq heç kim tərəfindən tanınmır. Hətta işğalçı Ermənistanın özü də Dağlıq Qarabağı rəsmən tanımır”.

Bu fikirləri mövzunu Moderator.az-a şərh edən istefada olan palkovnik, hərbi ekspert Şair Ramaldanov səsləndirib

Onun sözlərinə görə bunun qarşısını həm də mövcud olan beynəlxalq hüquq normaları alır:

“Beynəlxalq şərtlər Dağlıq Qarabağı tanımağa imkan vermir. Bu, deyure belədir.

Lakin faktiki olaraq isə biz görürük ki, bu gün Dağlıq Qarabağı rəsmən qəbul etməyən beynəlxalq təşkilatlar oradakı separatizmə və işğal faktına heç bir təzyiq göstərmirlər. ATƏT-in Minsk qrupunun üzvü olan ABŞ bəzi ölkələrə yardım edəndə onlara da yardım ayırır, digər üzvlər də hansısa formada belə addımlar atırlar. Azərbaycanın torpaqlarının işğal edilməsini bütün dünya qəbul edir, ancaq Ermənistana qarşı heç bir təsir vasitələrindən istifadə edilmir. Bu da bayaq dediyimiz ikili standartların təzahürüdür”.

Polkovnikin fikrincə, burada da əsas məqsəd geosiyasi qüvvələrin münaqişədən istədikləri vaxt öz məqsədləri üçün istifadə etmək niyyətidir.

Digər tərəfdən bu beynəlxalq şərtlər Azərbaycanın əl-qolunu müəyyən mənada bağlayır:

“Çünki Azərbaycan da atəşkəs razılaşmasını öhdəliyinə götürərkən bu şərtləri qəbul edib. Ona görə də atəşkəs rejimində hər hansı hərbi hərəkət atəşkəsin qaydalarının pozulması kimi qəbul edilir. Yəni güc tətbiq etməklə, hansısa əməliyat aparmaqla - istər kiçikmiqyaslı olsun, istərsə də genişmiqyaslı, əgər biz atəşkəs rejimini qəbul etmişiksə, bu, mümkün deyil. Biz atəşkəslə bağlı öhdəlik götürmüşük”.

Hərbi ekspert onu da xüsusi vurğulayıb ki, bu gün Azərbaycanın Dağlıq Qarabağda yerləşən bütün obyektləri atəş altına almaq imkanı var. Hər hansı dərinlikdə yerləşməsindən asılı olmayaraq onları məhv etmək mümkündür:

“Orada olan bütün obyektlər bizdə qeyd edilib və biz onları daim izləyirik. Sadəcə, qeyd etdiyim kimi, Azərbaycan atəşkəs rejimindən çıxmayıb və ona əməl etməsi ilə bağlı daimi hesabat verilir. Bunu hər iki tərəf edir.

Aprel döyüşləri dövründə Azərbaycan prezidenti də belə bir fikir səsləndirmişdi ki, əgər iki tərəf arasında hərbi əməliyatlar olarsa, Azərbaycan Silahlı Qüvvələri ən qısa bir zamanda işğalçı qüvvələri darmadağın edə bilər. Sadəcə, beynəlxalq normalar və götürülmüş öhdəliklər bu addımları atmağı məhdudlaşdırır. Azərbaycan hərbi baxımdan heç bir addım ata bilmir. Aprel savaşında da biz bunu gördük. Ermənistanın təmas xəttində törətdiyi təxribatın qarşısını almaq üçün Azərbaycan lazımi tədbirləri gördü və uğur qazandı. Azərbaycan düşməni geri oturdan kimi dərhal üçüncü qüvvələr işə qarışdılar.

Ona görə də bu amillər aradan qaldırılmamış Azərbaycan real şərtlərlə hərəkət edir”.