Paşinyan nəyin bahasına olursa-olsun, növbədənkənar parlament seçkilərinə və təbii ki, tükdən asılı olan hakimiyyətini möhkəmləndirənə qədər danışıqlar prosesindən yayınmaq istəyir.

Bu sözləri Axar.az-a analitik Elçin Mirzəbəyli Ermənistan tərəfindən Madrid prinsiplərindən imtina etmək məsələsinin gündəmə gətirilməsinə münasibət bildirərkən deyib. O bildirib ki, Nikol Paşinyanın Ermənistanın işğalı altında olan Azərbaycan ərazilərindəki separatçı rejimin danışıqlar prosesində iştirakı barədə iddiaları əslində 1994-cü ildən başlayan Minsk prosesindən imtina olunması anlamına gəlir:

“Həmsədr dövlətlərin bu günədək ən müxtəlif şəhər adları altında təqdim etdiyi prinsiplər isə bu kontekstdə heç bir əhəmiyyətə malik deyil. İstər “Madrid prinsipləri”, istər “Yenilənmiş Madrid prinsipləri”, istərsə də “Boyat Madrid prinsipləri”... Paşinyanın danışıqlar prosesinin formatı və prinsipləri haqqında səsləndirdiyi iddialar heç də yeni baş nazirin Dağlıq Qarabağ məsələsində daha israrlı mövqe nümayiş etdirməsindən irəli gəlmir”.

Analitikin sözlərinə görə, Paşinyan və onun komandası bu prosesə hazır deyil:

“Paşinyan danışıqlar prosesində fiaskoya uğrayacağından, bunun isə onun Ermənistandakı mövqelərinə zərbə vura biləcəyindən ehtiyatlanır. Bu baxımdan Nikol Paşinyanın seçkilərədək bu qəbildən olan çıxışları səngiməyəcək. Bu, daha çox qorxudan və özünəinamsızlıqdan irəli gələn çıxışlardır”.

Qeyd edək ki, Ermənistan Xarici İşlər Nazirliyinin rəsmi nümayəndəsi Arman Navasardyan açıqlamasında Madrid prinsiplərinin İrəvanı dalana apardığını və buna görə də Madrid prinsiplərinə yenidən baxmağın lazım olduğunu bildirib.