Fevralın 14-ü şəhid təyyarəçi, baş leytenant Yusif Yaqub oğlu Vəliyevin anadan olduğu gündür.

Şəhid təyyarəçi baş leytenant Yusif Yaqub oğlu Vəliyev 1968-ci il fevralın 14-də Nehrəm kəndində doğulub. 1985-ci ildə Nehrəm kənd orta məktəbini əla qiymətlərlə bitirib. 1985-1990-cı illərdə Riqa Ali Hərbi Aviasiya Akademiyasında təhsil alıb. Təhsilini başa vuran Yusif Vətənin dar günündə vətəni Azərbaycana dönərək, doğulduğu Naxçıvan torpağında xidmət etməyə başlamışdır.
1992-ci ildə Vətən uğrunda gedən döyüşlərdə qəhrəmanlıq və şücaət nümunəsi göstərən Vəliyev Yusif Yaqub oğlu 1992-ci ilin mayın 12-də şəhidlik zirvəsinə ucalmışdır.

Yusif Vəliyev torpaqlarımızın müdafiəsində və Milli Ordunun yaradılmasında göstərdiyi xidmətlər və apardığı mübarizə danılmaz bir həqiqətdir. Dar gündə Vətənə dönməsi onun qəhrəmanlığının sübutudur. Bu addımı onu igidliyin ən bariz nümunəsinə çevirmişdir. Qanadlanan şahinimiz Vətənin səmasına yüksələrək, düşmən üzərinə hücuma keçmiş, lakin qanadlarına tuş gələn düşmən gülləsi onu bu ənginliklərdə də əbədiyyətə qovuşdurmuşdur. Ona dəyən güllə xalqın ürəyindən keçsə də, bu yara heç kəsi sarsıtmamış, əksinə, hər kəsin iradəsini, təpərini möhkəmlətmiş, mübarizəyə səsləmişdir. Xalqımız hər zaman Yusif kimi oğulları ilə fəxr etmiş və edəcəkdir. Şəhidimizin Nehrəm kəndində Şəhidlər Xiyabanında büstü ucaldılmışdır.

Qaziler.az