Ermənistan Silahlı Qüvvələrinin Baş Qərargah rəisi Movses Akopyan istefaya göndərilə bilər.

Axar.az xəbər verir ki, bu barədə informasiyanı “Çorrord İşxanutyun” qəzeti yayıb. Qəzet Akopyanın fəaliyyətinin artıq rəsmi İrəvanı narahat etdiyini bildirib. Onu bu vəzifədə Qarabağ separatçılarının “müdafiə naziri” Levon Mnatsakanyanın əvəz edəcəyi gözlənilir:

“Hər iki generalın bir-biriylə münasibəti çox gərgindir. Hökumət görünür, xüsusilə bu iki generalı bir-biriylə üz-üzə gətirməyə çalışır”.

Qeyd edək ki, Ermənistan mətbuatı Akopyanın istefası barədə dəfələrlə məlumat yayıb. Onun keçmiş müdafiə naziri Seyran Ohanyanla yaxınlığı hökumətdə müəyyən qədər narahatlıq yaratmışdı.

Movses Akopyan Qarabağ ermənisidir. O, 2007-2015-ci illər ərzində separatçı rejimin "müdafiə naziri" işləyib. Akopyan Xocalı soyqırımının törədilməsində birbaşa iştirak edən Rusiyanın 366-cı motoatıcı alayının komandirlərindən olub.

Levon Mnatsakanyan isə Qarabağa məhz Ermənistandan 2015-ci ildə göndərilib. O, Baş Qərargahın keçmiş rəisi Yuri Xaçaturovun müavini kimi çalışıb. Mnatsakanyan da Qarabağ ermənisidir.