“Beynəlxalq Qızıl Xaç Komitəsinə müraciət edərək bildirirəm ki, məni İrəvana aparsınlar, gedib qardaşıma baş çəkmək istəyirəm”.

Qaziler.az bildirir ki, bunu AzVision.az-a açıqlamasında Kəlbəcərdə ermənilər tərəfindən girov götürülən Şahbaz Quliyevin qardaşı İlham Quliyev deyib. O, qardaşını görmək üçün İrəvana getməyə hazır olduğunu bildirib.

“Beynəlxalq Qızıl Xaç Komitəsinin nümayəndələrindən dəfələrlə xahiş etmişik ki, qardaşımla “whatsapp” vasitəsi ilə canlı danışaq, səsini eşidək. Amma icazə verməyiblər. Arada bir-iki dəfə videosunu gətiriblər. Amma biz istəyirik ki, onun səsini canlı eşidək. Qardaşıma görə çox narahatıq. Səhhəti yaxşı deyil. Sizin vasitənizlə Beynəlxalq Qızıl Xaç Komitəsinin nümyəndələrinə müraciət edirəm ki, heç olmasa, məni İrəvana qardaşımın yanına aparsınlar. Qardaşımın necə olduğu gözlərimlə görmək istəyirəm”,- girovun qardaşı vurğulayıb.

Qeyd edək ki, erməni girovluğunda olan Şahbaz Quliyevin səhhəti ağırlaşıb. O, İrəvan xəstəxanasına aparılıb. Kəlbəcər girovu bir aya yaxındır ki, İrəvanda xəstəxanada müalicə alır.

Xatıladaq ki, 2014-cü il iyulun 10-da Dilqəm Əsgərov və Şahbaz Quliyev Azərbaycanın işğal altında olan Kəlbəcər torpaqlarında Ermənistan silahlı qüvvələri tərəfindən girov götürülüb. Kəlbəcərə yaxınlarının məzarını ziyarətə gedən kəlbəcərli girovlarla bağlı həmin ilin dekabr ayında qondarma məhkəmə prosesi keçirilib. Separatçı rejimin qərarı ilə qurulan oyuncaq məhkəmə D.Əsgərovu ömürlük, Ş.Quliyevi isə 22 il müddətinə “azadlıqdan məhrum” edib.

Girovların azad edilməsi ilə bağlı bir çox addımlar atılsa da, onları azad etmək hələ mümkün olmayıb. Hazırda onlarla yalnız Beynəlxalq Qızıl Xaç Komitəsinin nümayəndələri vasitəsilə əlaqə saxlanılır.