Səlimov Araz Bahadur oğlu -1 iyun 1960-cı ildə Xocalı şəhərində doğulub. 1975-ci ildə burada orta məktəbin səkkizinci sinifini bitirib. Sonra texniki-peşə məktəbində traktorçu peşəsinə yiyələnib. Bir müddət kalxozda çalışıb.

1978-ci ildə Sovet Ordusu sıralarında hərbi xidmətə gedir. Əsgəri xidməti Çelyabinsk vilayətində keçir. 1980-ci ildə ordudan tərxis olunur və doğma yurdu Xocalıya qayıdır. O, burada südçülük –tərəvəzçilik savxozunda traktorçu işləyir.

1990-cı ildə könüllü olaraq Xocalı özünümüdafiə batalyonuna yazılır. Araz ilk gündən öz cəsarəti ilə fərqlənir, bir pulemyotçu kimi erməni təxribatlarına layiqincə cavab verirdi. Araz Səlimov Xocalı faciəsi zamanı son gülləsi qalana qədər vuruşaraq, qız-gəlini, qoca və uşaqları erməni quldurlarının caynağından qurtardı. Erməni yaraqlıları izinə düşərək onu, qardaşı Fəxrəddinlə birlikdə Əsgəranda vəhşicəsinə qətlə yetirirlər.

Xocalı faciəsi zamanı bu ailədən üç nəfər –ata və iki oğul şəhid olub.
Evlidir. Bir oğlu, iki qızı var.

Azərbaycan Resbublikası Prezidentinin 25 fevral 1997-ci il tarixli 553 saylı fərmanı ilə Səlimov Araz Bahadır oğluna ölümündən sonra “Azərbaycanın Milli Qəhrəmanı” adı verilmişdir.

Ağdam şəhərində Şəhidlər Xiyabanında dəfn edilmişdir.