İcra başçısı şəhid anasının əlindən öpdü -ŞƏMKİRDƏ

19:00 06.04.2017 Qarabağ

QAZİLER.AZ-ın xəbər verdiyi kimi, Azərbaycan Respublikası Səfərbərlik və Hərbi Xidmətə Çağırış üzrə Dövlət Xidmətinin təşəbbüsü və təşkilatçılığı ilə xidmətin əməkdaşlarından, keçmiş döyüşçülər və QHT rəhbərlərindən ibarət qruplar aprel şəhidlərinin ailələrinə baş çəkir, şəhidlərin ildönümü mərasimlərinə qatılırlar.

Artıq bir neçə gündür ki, bu səfərlər davam edir.

Səfərbərlik və Hərbi Xidmətə Çağırış üzrə Dövlət Xidmətinin şöbə rəisi, polkovnik-leytenant Əjdər Babazadə, Qarabağ Qazilər Birliyinin rəhbərliyində təmsil olunan Rafiq Kərimov və Rey Kərimoğlu Gəncə, Samux, Göygöl və Şəmkir rayonlarında şəhid ailələri ilə görüşərək şəhidlərin ildönümü mərasimlərində iştirak ediblər.

Bu gün də onlar Şəmkir rayonunda şəhid hərbi qulluqçu Əsgərov Təbriz Hamlet oğlunun məzarını ziyarət edərək şəhidimizin yas mərasimində olublar.

Şəhidin məzarı önündə rayon məktəblilərinin hazırladığı bədii kompozisiya təqdim edilib.

Tədbirdə Şəmkir Rayon İcra Hakimiyyətinin başçısı Alimpaşa Məmmədov, Səfərbərlik və Hərbi Xidmətə Çağırış üzrə Dövlət Xidmətinin Şəmkir rayon şöbəsinin rəisi, polkovnik-leytenant Rusif Babayev, Hərbi Prokurorluğun Qazax Qarnizonunun rəhbəri polkovnik Şahin Zamanov, rayon hüquq mühafizə orqanlarının və digər qurumların rəhbərləri iştirak edib.

Şəmkir Rayon İcra Hakimiyyətinin başçısı Alimpaşa Məmmədov şəhidin məzarı qarşısında çıxış edərək: “Mən bütün Şəhid analarının qarşısında diz çökürəm. Nə qədər ki, canımız sağdır, Şəhid analarının qarşısında diz çöküb, onların əllərindən öpmək lazımdır. Necə ki, indi mən bunu edəcəm" - deyərək şəhidin anasının əllərindən öpüb.

Polkovnik-leytenant Əjdər Babazadə şəhidin atası Hamlet Əsgərova Səfərbərlik və Hərbi Xidmətə Çağırış üzrə Dövlət Xidmətinin rəisi, general-leytenant cənab Arzu Rəhimovun başsağlığını çatdırıb.

Tədbirdə şəhidin döyüş yoldaşları da iştirak edib.

Şəhidin ruhuna dualar oxunub.

Təbriz Hamlet oğlu Əsgərov- 1993-cü il yanvarın 12-də Şəmkir şəhərində anadan olub. Təbriz Əsgərov 2010-cu ildə Şəmkir şəhərində yerləşən Nizami Gəncəvi adına tam orta məktəbi bitirib.

Çavuş Təbriz Əsgərov 2016-cı ilin aprel ayında Azərbaycan-Ermənistan təmas xəttində baş verən atışma zamanı qəhrəmancasına şəhid olub.

Təbriz Əsgərov ölümündən sonra göstərdiyi qəhrəmanlığa görə Azərbaycan Respublikasının Prezidenti İlham Əliyevin sərəncamı ilə "Hərbi xidmətdə fərqlənməyə görə" III dərəcəli medalı ilə təltif edilib.
Allah bütün şəhidlərimizə rəhmət eləsin!