Türk Dünyası Araşdırmaları Vəqfi Bakı Atatürk Litseyində ötən ilin aprel döyüşlərində Ermənistanın silahlı birləşmələrinin təxribatının qarşısının alınması zamanı şəhid olmuş hərbi pilot, mayor Təbriz Musazadənin və digər şəhidlərin anım mərasimi keçirilib. Mərasim iştirakçıları öncə şəhidlərimizin ruhunu bir dəqiqəlik sükutla yad ediblər.
Qaziler.az bildirir ki, anım mərasimində çıxış edən Türk Dünyası İqtisad Fakultəsinin dekanı Fərruh Tuzcuoğlu aprel döyüşlərində erməni işğalçılarının cəbhədə törətdikləri təxribatlara Azərbaycan Ordusunun verdiyi layiqli cavabdan, hərbçilərimizin döyüş meydanında göstərdiyi şücaətdən və qazanılan qələbədən danışıb. Bildirilib ki, dörd günlük döyüşdə düşmən Azərbaycan Ordusunun hərbi qüdrəti qarşısında vahiməyə düşdü.Tədbirdə çıxış edən litseyin müdiri Hüseyn Demrel Azərbaycan hərbçilərinin döyüş meydanında misilsiz qəhrəmanlıqlar göstərdiklərini, düşmənə ağır zərbələr endirdiklərini bildirib. Qeyd olunub ki, aprel döyüşləri Azərbaycan Silahlı Qüvvələrinin hərbi qüdrətini nəinki Ermənistana, bütün dünyaya bir daha nümayiş etdirdi. Dünya Azərbaycan Ordusunun bu döyüşlərdə yüksək peşəkarlıq, qəhrəmanlıq göstərdiyinin şahidi oldu.
Aprel döyüşlərində şəhid olanların əziz xatirəsinin hər zaman uca tutulacağını deyən Hüseyn Demrel döyüşlər zamanı şəhid olan igidlərimiz arasında liseyin şagirdləri Tayfun Musazadə və Onur Musazadənin ataları mayor, pilot Təbriz Musazadənin də olduğunu diqqətə çatdırıb. Hüseyn Demrel şəhidin övladlarının onlar üçün əmanət olduğunu və bu əmanəti göz bəbəyi kimi qoruyacaqlarını söyləyib.
Mərasimdə çıxış edən şəhid Təbriz Musazadənin pilot yoldaşları və digər natiqlər də şəhidlərin ruhunu ehtiramla yad edib, onların qəhrəmanlıqlarından danışıblar.
Şəhid pilotumuzun ailəsi adından çıxış Təbriz Musazadənin həyat yoldaşı Pərişan Musazadə göstərilən diqqət və qayğıya görə minnətdarlığını bildirib.
Mərasim Təbriz Musazadə adına Təhsil və İncəsənət Mərkəzi tərəfindən hazırlanmış liseyin şagirdlərinin, həmçinin, şəhid pilotumuzun övladlarının da qatıldıqları ədəbi-bədii kompozisiya idə davam etdirilib.
