QAZİLER.AZ-ın xəbər verdiyi kimi, Azərbaycan Respublikası Səfərbərlik və Hərbi Xidmətə Çağırış üzrə Dövlət Xidmətinin təşəbbüsü və təşkilatçılığı ilə xidmətin əməkdaşlarından, keçmiş döyüşçülər və QHT rəhbərlərindən ibarət qruplar aprel şəhidlərinin ailələrinə baş çəkir, şəhidlərinin ildönümü mərasimlərinə qatılırlar.
Bu məqsədlə Azərbaycan Respublikası Səfərbərlik və Hərbi Xidmətə Çağırış üzrə Dövlət Xidmətinin şöbə müdiri, polkovnik-leytenant Əjdər Babazadə, Qarabağ Qazilər Birliyinin rəhbərliyində təmsil olunan Rafiq Kərimov və Rey Kərimoğlu Göygöl rayonunda olublar.Onlar şəhid Sərxan Bağırovun məzarını ziyarət ediblər.
Şəhidin ildönümündə Göygöl rayonunun millət vəkili Rövşən Rzayev, Göygöl rayon İcra hakimiyyətinin başçısı Arif Seyidov, Səfərbərlik və Hərbi Xidmətə Çağırış üzrə Dövlət Xidmətinin Göygöl rayon şöbəsinin rəisi, polkovnik Mail Şahverdiyev, Göygöl rayonunun polis rəisi, rayon prokuroru, DTX rəisi və vergi xidmətinin rəisi də iştirak ediblər.
Şəhidin məzarı başında Göygöl rayonunun millət vəkili Rövşən Rzayev və rayon icra başçısı Arif Seyidov çıxış edərək şəhid döyüşçü Sərxan Bağırovun qəhrəmanlığından danışmış və şəhidin ailəsinə başsağlığı vermişlər.
Daha sonra Səfərbərlik və Hərbi Xidmətə Çağırış üzrə Dövlət Xidmətinin şöbə müdiri, polkovnik-leytenant Əjdər Babazadə şəhidin atası Azər Bağırova Səfərbərlik və Hərbi Xidmətə Çağırış üzrə Dövlət Xidmətinin rəisi, general-leytenant cənab Arzu Rəhimovun başsağlığını çatdırıb.
QAZİLER.AZ –ın xəbərinə görə, aprel şəhidi Sərxan Bağırovun məzarı yaxınlığında 1994-cü ildə Qarabağ döyüşlərində şəhid olmuş Nazim Əsgərovun da məzarı var.
Ziyarətçilər Nazim Əsgərovun da məzarını ziyarət edərək, hər iki şəhidimizin məzarına gül dəstələri qoymuş, ruhuna dualar oxumuşlar.
Sonra onlar şəhid Sərxan Bağırovun ildönümü mərasimində iştirak ediblər.
Şəhidin ruhuna fatihə verilib, dualar oxunub.
Allah bütün şəhidlərimizə rəhmət eləsin!
Sevda Elay (Əsgərova)
QAZİLER.AZ
