Xəbər verdiyimiz ki, Bakıda Azərbaycan ordusuna dəstək aksiyası keçirilir. Lent.az-ın əməkdaşının verdiyi məlumata görə, aksiya iştirakçılarının sayı durmadan artır. Artıq 10 mindən çox aksiyaçı müşahidə edilir. Azadlıq prospektindən Şəhidlər Xiyabanına kimi yürüş iştirakçıları “Şəhidlər ölməz, vətən bölünməz” , “Qarabağ bizimdir, bizim olacaq” və başqa şüarlar səsləndirir. Onların əlində xeyli sayda bayraqlar var.

Müxtəlif şüarlar səsləndirən azarkeşlər Şəhidlər xiyabanına üz tutublar. Hazırda davam edən aksiyaya qoşulanların sayı getdikcə artır.
***
Bu gün Azərbaycan Premyer Liqasında təmsil olunan komandaların fanatları aksiya keçirib.

Lent.az-ın məlumatına görə, aksiyada “Neftçi” “Xəzər-Lənkaran”, “Kəpəz” və “Qarabağ” klubunun “İmarət” fanklubları iştirak edib.
Bildirək ki, aksiya “Tribunadan səngərə” şüarı ilə keçirilib. Aksiya dövlət himninin səsləndirilməsi ilə başlayıb. Həmin aksiya metronun “Elmlər Akademiyası” stansiyası qarşısında başlayıb və Şəhidlər Xiyabanına yürüşlə davam edib.

Qeyd edək ki, aksiya zamanı müxtəlif şüarlar, o cümlədən “Komandan, əmr ver, gedək səngərə” kimi şüarlar səsləndirən gənclər orduya dəstəyini ifadə edib. Aksiyada polis əməkdaşları tərəfindən mühafizə tədbirləri görülüb.