Türkmənçay Müqaviləsinin (22 fevral 1828) imzalanmasının ildönümü ilə bağlı iki gün öncə Rusiya Xarici İşlər Nazirliyinin rəsmi facebook səhifəsində edilən paylaşımda təhrifə yol verilmişdi. Rusiya XİN-in Tarixi Sənədlər Departamentinə istinadən edilən paylaşımda Türkmənçay Müqaviləsi təhrif olunmuşdu, ora “şərqi Ermənistan” sözü əlavə edilmişdi.
Bir sıra ekspertlər bunu təxribat hesab edirdi.

Azərbaycan Xarici İşlər Nazirliyi dərhal məsələyə reaksiya vermişdi, Rusiyaya müraciət ünvanlamışdı.
Azərbaycan XİN-in açıqlamasında “Vurğulamaq istərdik ki, sözügedən müqavilədə, ümumiyyətlə, “Şərqi Ermənistan” sözünə istinad edilmir və əlbəttə, bu fakt Rusiya XİN-in Tarixi Sənədlər Departamentinə yaxşı bəlli olmalıdır.
Bu təhrifin aradan qaldırılmasını vacib hesab edirik və Rusiya XİN-in rəsmi sosial şəbəkə səhifəsində sözügedən yanlış məlumata müvafiq düzəlişin ediləcəyini gözləyirik”- deyə bildirilib.
Rusiya Xarici İşlər Nazirliyinin rəsmi səhifəsində yol verilən təhrif, səhv artıq aradan qaldırılıb.

Göründüyü kimi, RF XİN-in rəsmi facebook səhifəsində edilən paylaşımdakı “şərqi Ermənistan” çıxarılıb.

musavat.com