Bu dəfə də Xocalı rayonu ərazisini “Dağlıq Qarabağın Martuni rayonu” kimi təqdim etdilər...
Xəbər verdiyimiz kimi, iyulun 6-da saat 17:50 radələrində Rusiya sülhməramlılarının müvəqqəti yerləşdirildiyi Azərbaycan ərazisindəki qanunsuz erməni silahlı dəstələri tərəfindən Azərbaycan Ordusunun Ağdam rayonunun Əliağalı kəndi istiqamətində yerləşən bölmələri atəşə tutulub. Müdafiə Nazirliyindən verilən məlumata görə, atəş nəticəsində yol təkmilləşdirmə işlərinə cəlb olunan hərbi qulluqçumuz baş gizir Dadaşov Sakit Əhliman oğlu yaralanıb. Yaralıya ilkin tibbi yardım göstərilib və o, hərbi hospitala təxliyə olunub.
Lakin Rusiya Müdafiə Nazirliyinin rəsmi saytının “Dağlıq Qarabağda Rusiya sülhməramlı kontingenti” bölməsində bəhs edilən hadisə haqda 1 sutkadan çox müddətdə heç bir məlumat verilməyib. Halbuki Azərbaycan Müdafiə Nazirliyinin rəsmi xəbərində insident haqda Rusiya tərəfinin məlumatlandırıldığı bildirilib(bax://moderator.az/gundem/384653/rusiya-mn-ermenilerin-adamda-ateskesi-pozaraq-herbcimizi-yaralamasi-haqda-melumat-vermedi/).
Moderator.az xəbər verir ki, yalnız dünən - iyulun 7-i gecə saatlarında, Bakı vaxtilə saat 23:00-da, yəni insidentdən 29 saat 10 dəqiqə sonra Rusiya MN-in sözügedən saytında Ağdam istiqamətində atəşkəsin pozulması barədə məlumat yayılıb.
“Rusiya sülhməramlı kontingenti Dağlıq Qarabağ ərazisində tapşırıqları yerinə yetirməkdə davam edir.
27 müşahidə məntəqəsində Rusiya sülhməramlıları gecə-gündüz vəziyyəti izləyir və atəşkəs rejiminə əməl olunmasına nəzarət edirlər.
Bütövlükdə atəşkəsə bütün təmas xətti boyu riayət edilir. Eyni zamanda, 6 iyulda Dağlıq Qarabağın Martuni rayonunda erməni və Azərbaycan tərəfləri arasında atıcı silahların istifadəsi ilə bağlı bir insident qeydə alınıb. Atışma nəticəsində, Azərbaycan tərəfinin verdiyi məlumata görə, Azərbaycan Respublikasının Silahlı Qüvvələrinin hərbi qulluqçusu yaralanıb. Rusiya sülhməramlı kontingentinin komandanlığı hər iki tərəfin nümayəndələrinin iştirakı ilə araşdırma aparır” - Rusiya MN-in saytındakı məlumatda belə deyilir.
Rusiya MN-in atəşkəs pozuntusu haqda vaxtında məlumat yaymamasını şərhçi və ekspertlər müxtəlif cür yozur. Lakin bütün hallarda Azərbaycan torpaqlarındakı Rusiya sülhməramlı kontingentinin vəzifələrinin icrasındakı qeyri-operativlik və məsuliyyətsizlik göz qabağındadır...
Bundan əlavə, Rusiya MN-in saytında Azərbaycan Respublikasının Yuxarı Qarabağ ərazisi ilə bağlı həmişəki inzibati-hüquqi xətalar yenidən təkrarlanır. Yayılmış son informasiyalarından göründüyü kimi, məlumatda erməni tərəfinin atəş açdığı Xocalı rayon ərazisi “Dağlıq Qarabağın Martuni rayonu” kimi təqdim edilir...
