Azərbaycanın ağırlıqqaldırma üzrə Avropa və üçqat dünya çempionu Nizami Paşayevin "Report"a müsahibəsi
- Karyeranızı bitirdikdən sonra hansı işlərlə məşğul olursunuz?- Hazırda Xırdalan şəhərində özümə məxsus olan ağırlıqqaldırma zalında milli komandanın üzvü Dadaş Dadaşbəyli ilə məşğulam. Aprelin 4-də Rusiyanın Moskva şəhərində Avropa çempionatı keçiriləcək. İdmançımızı həmin yarışa hazırlayıram. Amma yığmada fəaliyyət göstərmirəm.
- Dadaş Dadaşbəyli dopinq cəzasını başa vurduqdan sonra necə təsir bağışlayır?
- Dadaşbəylinin 4 illik cəzanı 2019-cu il dekabrın 21-də başa çatıb. Pandemiya ilə bağlı heç bir yarış keçirilmədiyindən, o vaxtdan bu yana heç bir turnirdə iştirak etməyib. Amma məşqlərini davam etdirir. Avropa çempionatına qatılacaq.
- Bir çox idman zalının fəaliyyətinə icazə yoxdur. Belə bir şəraitdə çalışmaq sizə necə təsir edir?
- Dadaşbəyli yığmanın üzvü olduğu üçün yalnız ikimizin iştirakı ilə məşqlərimiz davam edir. Gənclər və idman Nazirliyindən icazə almışam. Deyiblər ki, milli üzvlərinə təklikdə məşq keçmək olar.
- Bu idman növündə ümumi vəziyyəti necə dəyərləndirirsiniz?
- Nəsə desəm, yalan olar. Çünki mən Azərbaycan Ağır Atletika Federasiyası ilə maraqlanmıram, heç bir məlumatım yoxdur. 5 ildir federasiyadan ayrılmışam.
- Bu cür nüfuzlu idman növü hazırda dopinq qalmaqalları ilə çalxalanır...
- Bilirsiniz ki, əvvəllər Ümumdünya Ağırlıqqaldırma Federasiyasının (IWF - red.) prezidenti Tamaş Ayan idi. Ondan sonra bir neçə dəfə federasiyanın rəhbəri dəyişilib. Dəqiq adları deyə bilməyəcəyəm. Pandemiya ilə əlaqədar IWF-ə yeni təyinat gerçəkləşməyib. Yəqin ki, koronavirus bəlası başa çatdıqdan sonra seçkilər keçiriləcək. Hər şey rüşvətlə bağlıdır. O vaxt kim Tamaş Ayana pul verirdisə, onları dopinq-testdən kənarda qoyurdu, yoxlamırdı. Pul verməyən komandaları isə məhv edirdi.
- Siz özünüz də Tamaş Ayanın dövründə oxşar problemlərlə üzləşmisiz. Necə düşünürsünüz, bu da qurulmuş oyunlardan irəli gəlirdi?
- Yəqin, 2006-cı ildə baş verənləri nəzərdə tutursunuz. Həmin il Polşaya yollanarkən test vermişdik. Alan Naniyevlə bir otaqda qalırdıq. Məşqçi hansı bərpaedici preparatları verirdisə, yalnız onları qəbul edirdik. Avropa çempionatında əsas rəqibim polşalı Şimon Koletski idi. Mən həmin yarışda çempion olmuşdum. Fikrimcə, polşalıya görə məni aradan götürdülər. Yarışda Naniyev də dopinq-testi vermişdi. Onda hər şey qaydasında oldu, amma məndə qadağan olunmuş maddə çıxdı. 2008-ci ildə də eyni hadisə təkrarlandı. Pekin Yay Olimpiya Oyunlarından öncə testdən keçmişdim. Olimpiya Kəndinə çatan kimi əşyalarımı otağa qaldırmağa imkan vermədilər. Dedilər ki, çantalarını qapının ağzına qoy, test ver. 5 testin hamısı neqativ çıxdı. Amma 8 ildən sonra dopinq aşkarlandığını dedilər. Bu, necə olur, mənə çatmır. Əlbəttə, hamısı oyundur. Dopinq var idisə, elə yerində deyərdilər.
- Yetirməniz olan Nicat Rəhimov Qazaxıstan yığmasının heyətində dünya və olimpiya çempionu oldu. Amma bu yaxınlarda ona qarşı olimpiadadakı dopinq-testini dəyişdirməsi ittihamı irəli sürülüb. Onun dopinq qəbul etməsinə inanırsınız?
- Əlbəttə, inanmıram. Üç olimpiadanın iştirakçısıyam. 2012-ci il London Yay Olimpiya Oyunlarında məşqçi kimi iştirak etmişəm. Orada analiz nəticəsini dəyişmək qeyri-mümkündür. Adamın dalınca 5 nəfər düşür. Bayıra çıxmaq istəyirsən, icazə vermirlər. Ya da yanına 2 nəfər salırlar, onlarla çıxırsan. Bu halda analizi necə dəyişdirmək olar, mənə çatmır. Təbii ki, bu da oyundur. Olimpiadada dopinq-testi dəyişdirmək mümkün deyil.
- Yığmanın Tokio olimpiadasındakı şanslarını necə dəyərləndirirsiniz?
- Bunu milli komandanın baş məşqçisindən soruşa bilərsiniz. Heç nədən xəbərim yoxdur. Hazırda Dadaşbəyli ilə məşğulam və onun hazırlığı barədə məlumat verə bilərəm.
- O, hansı çəki dərəcəsində mübarizə aparacaq və nəyə ümid edir?
- Əvvəl gənclər arasında 96 kq-da çıxış edirdi. Bilirsiniz ki, çəki dərəcələri dəyişdirildi. Əvvəl say 8 idi, indi 10 ediblər. Dadaş Dadaşbəyli Azərbaycanı 109 kq-da təmsil edəcək. Ümidvaram ki, zədə olmasa, böyük uğurlar qazanacaq. Cəzalı olduğu üçün müəyyən yarışlarda iştirak edə və qarşıdakı olimpiadaya vəsiqə qazana bilməyib. İnanıram ki, 2024-cü ildə bayrağımızı yüksəklərə qaldıracaq və himnimizi səsləndirəcək.
- Demək, Tokio Yay Olimpiadasında iştirak şansını itirib...
- Bəli. Moskavadakı Avropa çempionatı lisenziya xarakteri daşımır. Olimpiadaya vəsiqə qazanmaq üçün üçün 2018 və 2019-cu il dünya çempionatlarında iştirak etməli idi. Əvvəllər lisenziya komanda hesabında verilirdi, onda istədiyin idmançını apara bilirdin. İndi isə qaydalar dəyişdirilib, lisenziyalar şəxsi xarakterlidir. Bunun üçün idmançı xal yığmalı və sonda ona lisenziya təqdim olunmalıdır.
- Dadaşbəylidən Avropa çempionatında uğurlu nəticə gözləmək olar?
- Diskvalifikasiya müddəti başa çatdıqdan sonra məşqlərə başladıq. Diz nahiyyəsində problem oldu. Federasiyanın prezidenti Cahangir Əsgərov sağ olsun, onu Türkiyənin paytaxtı Ankaraya ezam etdi və Dadaşbəyli dizindən əməliyyat olundu. 2 aydır birgə məşq edirik, hər şey yaxşıdır. Hazırda mənə onun Avropa çempionatında iştirakı vacibdir. Medal qismət olar, lap yaxşı, olmasa da, önəmli deyil. Əsas hədəfimiz bu ilin sentyabrında Konya şəhərində keçiriləcək İslam Həmrəylik Oyunları, gələcəkdə baş tutacaq dünya çempionatları və 2024-cü il Paris Olimpiya Oyunlarıdır.
