"Qarabağ bizimdir və heç kimə verməyəcəyik" - "Kurtlar Vadisi"nin məşhur aktyoru

"Qarabağ bizimdir və heç kimə verməyəcəyik" -  "Kurtlar Vadisi"nin məşhur aktyoru backend

Türkiyənin məşhur "Kurtlar Vadisi Pusu" serialının baş qəhrəmanlarından biri olan aktyor Erhan Ufak Bakıya gəlib.

Musavat.com xəbər verir ki, Erhan Ufaq media nümayəndələrinin suallarını cavablandırıb.

- Erhan bəy, ölkəmizə ilk dəfə gəlirsiniz?

- Azərbaycana bir neçə dəfə gəlmişəm. Biz yad ölkəyə gəlməmişik, sanki öz vətənimizə ayaq basmışıq.
Amma təbii ki, həyəcan keçiririk, hər dəfə gələndə eyni hissləri yaşayıram.

- Sizin yaradıcılığınızda "Kurtlar Vadisi" serialı xüsusi rol oynayıb. Fəaliyyətinizdə serialın önəmi nədən ibarətdir?

- "Kurtlar Vadisi" serialı bizim adımızı tanıdan, məşhur edən bir layihədir.

- "Kurtlar Vadisi" serialının davamı olaraq "Kurtlar Vadisi Xaos"un çəkilməsi haqqında xəbərlər yayılmışdı. Bu nə dərəcədə doğrudur?

- Hələ ki, dəqiq məlumatımız yoxdur. Bu haqda serialı çəkən şirkət qərar verir. Əgər serialın davamı çəkiləcəksə, xəbər verəcəklər. Birlikdə bu haqda öyrənəcəyik. Hələ ki, serialın davamının çəkilməsi haqqında məlumatımız yoxdur.

- "Kurtlar Vadisi Xaos" serialı çəkilən zaman layihədə yer alacaqsınızmı?

- Serial çəkiləcəksə, layihədə yer alacam.

- Aktoy Necati Şaşmazla dostluq münasibətiniz davam edirmi?

- Hər hansı problemimiz yoxdur. Münasibətimiz çox gözəldir. Hazırda pandemiya dönəmidir. Bütün serial və proqramların yayımı dayandırılıb. Bütün aktyorların və eləcə də mənim həmkarlarımızla çox gözəl münasibətimiz var.


- 14 il "Kurtlar Vadisi" serialında çəkilmisiniz. Belə bir layihədə yer almaq sizin üçün nə deməkdir?

- 14 il davam etmək başqa bir hissdir. İnsanlar səni sevir, tanıyır. Dünyanın hansısa ölkəsinə gedən zaman səni tanıyırlar, hörmət edirlər, sevirlər.

- Hazırda Türkiyə seriallarında dram janrına daha çox üstlünlük verilməyə başlanılıb...

- Bunun da müddəti var. Bəlli bir dönəmdə sevgi, komediya janrı üstünlük təşkil edirdi. İnsanların xüsusi marağına səbəb olan seriallar çəkilir. Həmin layihə tutduqdan sonra davamı çəkilir.

- Türkiyədə "Netflix" sosial platforması üstünlük təşkil edir. Sizə televiziya yoxsa sosial platformada yer almaq daha asandır?

- Aktyor kimi fəaliyyət göstərirsənsə, hər hansı çərçivə olmamalıdır. Televiziya da, platforma da ola bilər.

- Sizi Azərəbaycanda "Kurtlar Vadisi" serialının Güllü Erhanı kimi tanıyırlar.
Ölkəmizdə reaksiyalar necədir?

- Adımla da, obrazımla da müraciət edirlər. Adım Erhan Ufakdır, obrazım isə Güllü Erhandır. Ona görə də hər hansı çətinliyim yoxdur.

- Türkiyənin tanınmış şirkəti olan "Osman Sınav" Qarabağla bağlı film çəkəcək.

- Bu haqda Bakıya gələrkən məlumat verdilər. İnşallah film çəkərlər. Çox gözəl bir layihədir.

- Qarabağla bağlı layihədə yer almaq istərdinizmi?

- Təbii ki, böyük məmuniyyətlə Qarabağ haqqında çəkilən layihədə yer almaq istəyərdim.

- Vətən müharibəmizdə qalib gəldik. Təəssüratlarınız necədir?

- Qarabağ bizim məbədimizdir. Qarabağ bizimdir və heç kimə verməyəcəyik.