ABŞ-da yaşayan azərbaycanlı hüquqşünas Vüqar Cəfərov böyük uğurlara imza atır.

Qaziler.az bildirir ki, AzNews.az-ın məlumatına görə, 2003-cü ildən Bostonda yaşayan həmyerlimiz qısa müddət ərzində yüksək nailiyyətlər qazanıb.

Belə ki, o, Nyu York vəkillər kollegiyasının həqiqi üzvü seçilib. Bundan əlavə Amerika vəkillər kollegiyasının, eləcə də Yeni İngiltərə Müsəlman Vəkillər kollegiyasının da üzvüdür. O, müştərilərinin hüquqlarını Federal Məhkəmələrdə və dövlət orqanlarında müdafiə etmək hüququna malikdir.

Yeganə Azərbaycanlı vəkildir ki, məhkəməyə tabel silahı ilə daxil ola bilir.

Hazırda hüquq üzrə doktorantura (SJD – Senior Judicial Doctor) proqramına qoşularaq təhsilini davam etdirən həmyerlimiz Bostondakı azərbaycanlıların təşkil etdikləri toplantı və görüşlərdə aktiv iştirak edir, diaspora ilə sıx əlaqədədir.

Vüqar Eyyub oğlu Cəfərov 1976-ci ilin fevralın 25-də Yardımlı rayonunun Osnağaran kəndində dünyaya gəlib. Doqquzuncu sinifdə oxuyanda təsadüfən televizorda eşitdiyi bir elan onun həyatını dəyişib. Həmin elanın sorağı ilə Bakıya gəlib və müsabiqədən keçərək Türkiyədə təhsil almağa göndərilən istedadlı şagirdlərin sıralarına qəbul edilib. İki il Türkiyədə liseydə oxuyub. Sonra Ankara Universitetinin hüquq fakultəsinə daxil olub. 2000-ci ildə ali təhsilini başa vurub. 2003-cü ildə magistr təhsilini bitirərək doktoranturaya qəbul olub. Doktoranturada təhsil aldığı zaman ABŞ-ın “Yaşıl kart” lotoreyasını udaraq orada yaşamaq hüququ qazanıb və qısa müddətdə Massaçusets ştatına yollanıb.

Özünün sözlərinə görə, ABŞ-a gedəndə cibində cəmi 250 dollar pulu olub. Türkiyədə yaşayarkən idmanın karate növü üzrə professional şəkildə məşğul olması, qara kəmər qazanması ABŞ-da onun köməyinə yetişib. Bir il məşqçi kimi fəaliyyət göstərib. Sonra Massaçusets ştatında Konnektikut Hüquq universitetinə qəbul olunur. Oranı bitirdikdən sonra vəkillik fəaliyyətinə başlayır. Hazırda ştatın ən yaxşı vəkillərindən biri kimi ad qazanıb.