Türkmənistan təmsilçisi Nuryagdı Meredov abakus, mental arifmetika və riyaziyyat üzrə keçirilən "Asia World Brain Cup-2026" beynəlxalq çempionatının super çempionu titulunu qazanıb.

Qaziler.az türkmənistan mediasına istinadən bildirir ki, yarışlar Daşkənddə baş tutub.

Mükafatlandırma mərasimi Gənclərin Yaradıcılıq Sarayında təşkil olunub. Təşkilatçılar türkmənistanlı iştirakçının eyni vaxtda bir neçə fənn — abakus, mental arifmetika və riyaziyyat üzrə göstərdiyi yüksək nəticələri və müstəsna çıxışını xüsusi qeyd ediblər. Turnirin yekununda ona sertifikat, xatirə medalı və üzərində "Super Champion" yazılmış kubok təqdim edilib.

Gənc riyaziyyatçı üçün bu, ilk qələbə deyil. O, daha əvvəl də mental arifmetika üzrə yarışlarda uğurlar qazanıb və bu yeni titul onun sözügedən istiqamətdə apardığı ardıcıl fəaliyyətin davamı olub.

Qeyd edək ki, mental arifmetika yapon hesablama aləti olan abakus obrazına əsaslanaraq hesablamaların zehində aparılmasına söykənir. Bu metodika yaddaşın, diqqətin və təfəkkür sürətinin inkişafı üçün istifadə olunur və bu sahə üzrə bir çox ölkələrdə beynəlxalq turnirlər keçirilir.

QAZİLER.AZ