Qərbi Avropanın ən yüksək zirvəsi olan Monblanın hündürlüyü bir il ərzində 1,29 metr azalaraq dəniz səviyyəsindən 4807,47 metr təşkil edib.

Qaziler.az xəbər verir ki, “The Guardian” qəzetinin məlumatına görə, bu barədə çərşənbə günü 2001-ci ildən bəri zirvəni müntəzəm olaraq ölçən fransız geodeziyaçılar qrupu məlumat yayıb.

Monblanın hündürlüyü zirvədəki qar və buz örtüyünün qalınlığının dalğalanması səbəbindən dəyişir. Mütəxəssislər izah edirlər ki, buna temperatur, külək və yağıntılar təsir göstərir. Keçən ay peyk texnologiyaları və dronlardan istifadə edilməklə həyata keçirilən ekspedisiya zamanı aparılan ölçmələr göstərib ki, 2025-ci ildə zirvə indikindən 1,29 metr daha hündür olub.

Bununla belə, hazırkı göstərici Monblanın hündürlüyünün son dövrlərin ən aşağı həddinə düşdüyü 2023-cü ildəki göstəricidən 1,88 metr yüksəkdir. Müşahidə dövründə dağın maksimal hündürlüyü 2007-ci ildə qeydə alınıb — 4810,90 metr. O vaxtdan bəri zirvə 3,43 metr alçalıb.

Mütəxəssislər zirvənin yüksəkliyindəki illik dəyişikliklərlə qlobal istiləşmə səbəbindən Alp dağlarında buzlaqların ümumi kiçilməsi arasında birbaşa əlaqənin olmasına qarşı xəbərdarlıq edirlər. Onlar qeyd edirlər ki, zirvədəki qar və buz örtüyünün dərinliyi buzun ümumi kütləsini və ya həcmini birbaşa əks etdirmir. Buna görə də, bir ildə yüksəkliyin artması dağın buzlaq kütləsi qazandığı anlamına gəlmir. Yəni zirvədə qarın artması qlobal istiləşmənin dayanması demək deyil.

QAZİLER.AZ