Uqandanın Kibale Parkında yaşayan dünyanın ən böyük vəhşi şimpanze qrupu olan Nqoqo toplumunun daxilən parçalandığı və illərlə davam edən qanlı qarşıdurmalara səbəb olduğu bildirilir.

Qaziler.az bildirir ki, “Science” jurnalında dərc olunan araşdırmada bir vaxtlar bir olan toplumun düşmənə çevrilməsi insan vəziyyətinə ən yaxın paralel kimi təsvir edilir.

Tədqiqatçılar 1995-ci ildən 2015-ci ilə qədər sosial cəhətdən bir olan Nqoqo şimpanzelərinin tədricən iki qrupa bölündüyünü müəyyən ediblər.

Qərb və mərkəzi adlanan bu iki qrup arasında gərginlik 2018-ci ilə qədər daimi oldu.

Qərb qrupu yeddi il ərzində mərkəzi qrupa qarşı 24 mütəşəkkil və koordinasiyalı hücum həyata keçirib. Bu qarşıdurmalarda ən azı 7 yetkin erkək və 17 bala şimpanze həyatını itirib.

Primatoloq Aaron Sandel qrupun dağılmasına səbəb olan bir neçə əsas faktora diqqət yetirir.

2015-ci ildə qrupun alfa erkəyinin statusunu itirməsi və yerinə yeni liderin seçilməsi cəmiyyət daxilində qütbləşməni sürətləndirdi.

Bundan əlavə, toplum daxilində müxtəlif "məhəllələr"i birləşdirən yaşlı və nüfuzlu şimpanzelərin ölümləri sosial bağları zəiflətdi.

2017-ci ildə baş verən bir xəstəlik qrupu fiziki və sosial cəhətdən daha da kövrək etdi və parçalanma qaçılmaz oldu.

QAZİLER.AZ