Honq Konq investisiya şirkəti “Haitong International Securities”in analitiki Jeff Pu “iPhone 16 Pro”nun “iPhone 15 Pro”dan əhəmiyyətli dərəcədə fərqlənəcəyini söyləyib. O zaman “Apple”ın yeni smartfonunda nə dəyişəcək?

Ekspertin fikrincə, gələn il təqdim olunacaq “iPhone 16 Pro” və “iPhone 16 Pro Max” modellərində “Wi-Fi 7” dəstəyi və yenilənmiş 48 meqapiksellik ultra geniş bucaqlı obyektiv olmalıdır.

“Wi-Fi 7”yə malik cihazlar eyni vaxtda 2.4 GHz, 5 GHz və 6 GHz diapazonlarında məlumat göndərə və qəbul edə biləcək. Nəticədə daha yüksək sürət, daha az gecikmə və etibarlı bağlantılar əldə ediləcək. Bu texnologiya 40 Gbit/s-dən çox məlumat ötürmə sürətini maksimum təmin edəcək ki, bu da “Wi-Fi 6E”dən dörd dəfə sürətlidir.

“iPhone 16 Pro”nun 6,3 düymlük ekrana sahib olacağı, “iPhone 16 Pro Max”ın isə 6,9 düymədək artacağı gözlənilir. Üstəlik, bütün “iPhone 16”lar “Apple A18” çipləri ilə satışa çıxarılacaq. Standart modellər “A18 Bionic” çipləri ilə təchiz oluna bilər, smartfonun “Pro” versiyaları isə “A18 Pro” çiplərini alacaq.

“Apple”ın “iPhone 16” seriyasını 2024-cü ilin sentyabrında təqdim edəcəyi gözlənilir.

QAZİLER.AZ