Elm adamları 1950-cı ildən bəri okeanların sahil bölgələrində aşağı oksigenli sahələrin 10 qat, sıfır oksigenli sahələrin isə 4 qat artdığını açıqlayıb.

Publika.az xəbər verir ki, açıqlamada 1950-ci ildən bu yana okeaların 77 milyard ton oksigen itirdiyinə diqqət çəkilib.

Oksigen çatışmazlığı səbəbindən həmin bölgələrdə artıq dəniz canlıları da yaşamır. Getdikcə ərazisi böyüyən oksigensiz bölgələr dəniz məhsulları ilə qidalanan yüz milyonlarla insanı ac qoya bilər.

İstilənən sularda oksigen faizinin aşağı düşməsi, yerdən çıxarılan yanacaqlardan qaynaqlanan iqlim dəyişikliyi oksigensizliyin ən böyük səbəbi kimi göstərilir. Sahillərin ölü bölgələrə çevrilməsi isə dəniz sularına qarışan kimyəvi maddələr və kanalizasiya suları səbəbilə baş verir.

“Science” dərgisinin okeanlar və ölü bölgələrlə bağlı araşdırmasına görə, dünya tarixindəki ən böyük nəsil tükənmə hadisələri qlobal istiləşmə və oksigen çatışmazlığı səbəbindən baş verib.

Okeanlar, xüsusilə, yoxsul ölkələrdə 500 milyondan çox insan üçün qida mənbəyi, 350 milyon çox insan üçünsə iş yeridir.