“Heç bir profilaktik tədbir heç bir halda quduzluqdan mütləq qorunma təmin etmir”.

Qaziler.az xəbər verir ki, bunu yoluxucu xəstəliklər üzrə mütəxəssis, tibb elmləri doktoru Vladimir Neronov “Gazeta.Ru”ya bildirib.

“Quduzluq sinir sistemini zədələyir və klinik əlamətlər inkişaf etdikdən sonra demək olar ki, həmişə ölümlə nəticələnir. Bununla belə, dişləmədən sonra vaxtında aparılan profilaktika xəstəliyin inkişafının qarşısını almağa imkan verir. Quduzluq əleyhinə vaksin orqanizmdə artıq mövcud olan virusu "öldürmür". Onun vəzifəsi immun cavabını əvvəlcədən işə salmaqdır ki, orqanizm virus sinir sisteminə çatana qədər müdafiə hazırlaya bilsin. Buna görə də, potensial təhlükəli təmasdan sonra xəstəliyin ilk əlamətlərini gözləmək olmaz: profilaktikaya mümkün qədər tez başlamaq lazımdır2, - deyə həkim izah edib.

Neronovun sözlərinə görə, müasir peyvəndlər hüceyrə kulturaları və ya embrionlaşmış yumurtalardan istifadə etməklə istehsal olunur. ÜST daha zəif təhlükəsizlik profilinə və daha aşağı immunogenliyə görə sinir toxumasına əsaslanan köhnə dərmanları tövsiyə etmir.

“Ağır yoluxma hallarında təkcə peyvənd deyil, həm də quduzluq əleyhinə immunoqlobulinin vurulması tələb oluna bilər. Bunlar prinsipial olaraq fərqli vasitələrdir: vaksin bədənin öz immun cavabını formalaşdırır, immunoqlobulində isə artıq hazır anticisimlər var və o, dərhal, lakin müvəqqəti müdafiəni təmin edir. Bununla belə, heç bir profilaktik tədbir istənilən şəraitdə mütləq zəmanət vermir. Profilaktikanın effektivliyi müalicəyə nə dərəcədə tez başlanılmasından, yaranın düzgün təmizlənməsindən, təmasın nə qədər ciddi olmasından və profilaktika sxeminə əməl edilib-edilməməsindən asılıdır. Məhz buna görə də dişləmədən sonra yalnız bir iynə deyil, bütün tədbirlər kompleksi vacibdir”, - deyə həkim fikrini yekunlaşdırıb.

QAZİLER.AZ