Sağlamlığın qorunması üçün düzgün qidalanma, kifayət qədər yuxu və fiziki aktivlik əsas amillərdir. Bəzi insanlar orqanizmi "detoks" (orqanizmin zərərli toksinlərdən və zəhərli maddələrdən təmizlənməsi prosesi-red.)etməyə kömək etdiyi iddia edilən üsullardan da istifadə edirlər. Lakin qeyd etmək lazımdır ki, sağlam insanlarda qaraciyər, böyrəklər və digər orqanlar orqanizmin təbii təmizlənmə funksiyasını yerinə yetirir və "detoks" pəhrizlərinin faydası elmi cəhətdən tam sübut olunmayıb.

Qaziler.az xarici mətbuata istinadən bildirir ki, məqalədə qeyd olunan tövsiyələr bunlardır:

1. Günü bir stəkan ağcaqayın şirəsi ilə başlayın
Ağcaqayın şirəsi C vitamini ilə zəngindir və xoş şirin dada malikdir. Məqaləyə görə, o, özünüzü daha gümrah hiss etməyə kömək edə və qaraciyər ilə böyrəklərin fəaliyyətini dəstəkləyə bilər.

2. Kaliumla zəngin qidalar qəbul edin
Kaliumla zəngin qidalara gavalı, avokado, kişmiş, şaftalı, çiyələk, ispanaq, alma və təzə göbələklər daxildir.

3. Sarımsağı daha tez-tez yeyin
Sarımsaq antioksidant xüsusiyyətlərə malikdir və immun sisteminin fəaliyyətini dəstəkləyə bilər.

4. Gicitkən çayı için
Məqalədə gicitkən çayının həzmi dəstəklədiyi qeyd olunur.

5. Spa prosedurlarından yararlanın
Masaj, sauna və spa prosedurları rahatlamağa və ümumi rifahın yaxşılaşmasına kömək edə bilər.

6. Gənəgərçək yağı ilə kompres edin
Soyuq sıxım üsulu ilə əldə edilmiş gənəgərçək yağı ilə dəsmalı isladın, qarın nahiyəsinə qoyun və üzərinə isti su torbası yerləşdirərək təxminən 30 dəqiqə uzanın.

7. Yağla ağız yaxalama üsulunu tətbiq edin
Bir çay qaşığı üzvi kokos yağını bir damcı efir yağı ilə qarışdırın və təxminən 10 dəqiqə ağızda saxlayaraq yaxalayın.

8. Dərinin pilinqi ilə limfa sistemini stimullaşdırın
Xüsusi fırça ilə gündə iki dəfə ölü dəri hüceyrələrini təmizləyin. Prosedura ayaqlardan başlayaraq baş istiqamətinə doğru aparılır. Daha sonra növbə ilə soyuq və isti su ilə duş qəbul edin.

9. Psillium (bağayarpağı toxumu qabığı) istifadə edin
Bir çay qaşığı psilliumu blenderdə üyüdərək bir stəkan suya əlavə edin. Məqalədə bunun iki həftə ərzində gündə bir dəfə qəbul edilməsi tövsiyə olunur. Psillium liflə zəngindir. Qəbul dövründə kifayət qədər su içmək vacibdir.

Diqqət! Hər hansı yeni pəhrizə, qida əlavəsinə və ya sağlamlıq proqramına başlamazdan əvvəl ailə həkimi və ya digər ixtisaslı tibb mütəxəssisi ilə məsləhətləşmək tövsiyə olunur.

QAZİLER.AZ