Elm adamlarının COVID-19 pandemiyasının geniş yayıldığı vaxtlarda ölüm səbəbləri ilə bağlı şokedici açıqlaması bütün fikirləri alt-üst edib.

Qaziler.az-ın məlumatına görə, bu barədə “Science Alert” yazır.

Məlum olub ki, bir çox ağır xəstələr üçün əsas təhlükə koronavirusun özü deyil, müalicə zamanı yaranan fəsadlar olub.

Amerikalı tədqiqatçılar ağır pnevmoniya və tənəffüs çatışmazlığı olan 500-dən çox xəstənin (onlardan 190-ı COVID-19) məlumatlarını təhlil edərək gözlənilməz nəticəyə gəliblər. Süni intellektdən istifadə edərək, onlar sağ qalanların və ölənlərin vəziyyətini müqayisə edərək, faciəvi nəticələrin əsl səbəblərini müəyyən ediblər. Əsas qatilin sitokin fırtınası olduğuna dair geniş yayılmış iddialar təsdiqini tapmayıb.

Məlum olub ki, ölüm hallarının əksəriyyəti ventilyasiya ilə əlaqəli pnevmoniyadan, yəni süni tənəffüs aparatında olan bakterial infeksiyaya yoluxma səbəbindən baş verib.

Bu tip pnevmoniyanın diaqnozu olduqca çətindir və onun aşkarlanması üçün mövcud üsullar kifayət qədər təsirli deyil. Tədqiqatçılar vurğulayıblar ki, ikincili bakterial infeksiyalar mexaniki ventilyasiyada olan xəstələr üçün əsas təhlükəyə çevrilib. Bu fakt gələcəkdə insanların həyatını xilas etmək üçün həmin aparatların təmizlənməsini və diaqnostik protokolların təkmilləşdirilməsini təcili tələb edir.

QAZİLER.AZ