Kaliforniyanın Santa Barbara Universitetinin alimləri müəyyən ediblər ki, hamiləlik qadının beynindəki boz maddənin həcminin uzun müddət azalmasına gətirib çıxarır.

Tədqiqatın nəticələri “Nature Neuroscience” jurnalında dərc olunub.

Hamiləliyin beynin strukturuna təsiri barədə məlumatı mütəxəssislər süni mayalanma nəticəsində hamilə qalan Kaliforniya sakininin üzərində aparılan müşahidələr nəticəsində əldə ediblər. Subyektin beyni konsepsiyadan üç həftə əvvəl, hamiləliyin müxtəlif dövrlərində və uşaq doğulduqdan sonra ilk iki ildə bir neçə dəfə maqnit rezonans tomoqrafiya skanerindən istifadə edilməklə ölçülüb.

Alimlər müəyyən ediblər ki, hamiləlik beyindəki boz maddənin həcminin kiçik, lakin əhəmiyyətli dərəcədə azalmasına gətirib çıxarır (2-5%). Bu, xüsusilə hipokampusun bəzi hissələrində (6-8%), kaudat nüvəsində, diqqət və duyğulara cavabdeh olan korteks sahələrində nəzərə çarpır.

Beyin strukturunda olan bu dəyişikliklər tədricən hamiləlik dövründə daha çox nəzərə çarpır və doğuşdan sonra da davam edir. Eyni zamanda, ağ maddənin həcmi birinci və ikinci trimestrdə əhəmiyyətli dərəcədə artıb, lakin uşaq doğulduqdan sonra orijinal dəyərlərə qayıdıb.

QAZİLER.AZ