İki həftə 20 dəqiqəlik yoqa-nidra seansları sınaqda iştirak edən könüllülərin yuxusunu, yaddaşını, qərar qəbul etmə qabiliyyətlərini və düşüncələrini yaxşılaşdırıb.

Qaziler.az bildirir ki, bunu PLOS ONE jurnalında dərc olunan araşdırma göstərib.

Yoqanın aktiv formaları müxtəlif duruşlara, nəfəs almağa və əzələlərin idarə olunmasına diqqət yetirir. Yoqa-nidra isə əksinə hərəkət tələb etmir: o, uzanmış vəziyyətdə şüurlu istirahət etməyə nail olmaq məqsədi daşıyır.

Hindistanlı alimlər yeni araşdırmada yuxunun müxtəlif fazalarında beyin fəaliyyətini, onların müddət və tezliyini qiymətləndirməyə imkan verən polisomnoqrafiya metodundan istifadə ediblər. İki həftəlik yoqa-nidradan sonra iştirakçılar yuxu keyfiyyətində və dərin yuxuda delta dalğalarının nisbətində əhəmiyyətli bir artım yaşayıblar. Əvvəlki araşdırmalar bunun yuxu keyfiyyətinin, diqqətin və yaddaşın yaxşılaşması ilə əlaqəli olduğunu göstərib.

Müəlliflər hesab edirlər ki, onların tədqiqatı yoqa-nidranın yuxu keyfiyyətini və beyin funksiyasını yaxşılaşdırdığına dair ilk yüksək keyfiyyətli, obyektiv sübutdur.

QAZİLER.AZ