Dəsmallarınızı mütəmadi olaraq yumalısınız. Lakin bəzən bunun ən vacib şey olmadığını düşündüyünüz üçün təxirə salırsınız.

Qaziler.az UNİAN-a istinadla bildirir ki, bu barədə “Mirror”da məlumat dərc edilib. Qeyd edilib ki, mütəxəssislər hər üç istifadədən sonra dəsmalları yumağı məsləhət görürlər. Ancaq bunu etməsəniz, sağlamlığınızın pisləşməsi və hətta xoşagəlməz infeksiyalara yoluxma ehtimalınız var. Buna səbəb dəsmalların kifayət qədər tez-tez yuyulmadığı zaman içində toplanan bakteriyaların artmasıdır.

Arizona Universitetinin mikrobioloqu Çarlz Gerba tərəfindən aparılan araşdırma, hamam dəsmallarının təxminən 90%-nin nəcisdə olan koliform bakteriyalarla çirkləndiyini və təxminən 14%-də “E.coli” olduğunu müəyyən edib.

“E. Coli”nin səbəb ola biləcəyi sağlamlıq problemlərinə diareya, sidik yollarının infeksiyaları, tənəffüs yolu xəstəlikləri və ağır hallarda meningit kimi infeksiyalar daxildir. Bunun qarşısını isə dəsmallarınızı yumaqla almaq olar. Bununla belə, “E.coli”nin əksər ştamları heç bir risk yaratmır və sağlam bağırsaq traktının bir hissəsidir.

QAZİLER.AZ