Ermənistan Səhiyyə Nazirliyi bu günə qədər Qarabağ müharibəsi zamanı öldürülmüş 2 966 erməni hərbi qulluqçunun meyitinin tibbi məhkəmə ekspertizasını keçirib.

“Report” xəbər verir ki, bu barədə “News.am”a Ermənistanın səhiyyə nazirinin mətbuat katibi Alina Nikoqosyan bildirib.

“Müharibənin başlanğıcından bu günə qədər meyitlərin tanınması üçün onların qohumlarından 1 816 DNT nümunəsi və meyitlərdən 993 DNT nümunəsi götürülüb. 10 dekabr tarixinə qədər ölənlərin qohumunun 256 və 541 meyit nümunəsi araşdırma mərhələsindədir”, - Nikoqosyan deyib.

Onun sözlərinə görə, bu gün 302 meyitin məhkəmə-genetik tədqiqatları müəyyən edilib. Tədqiqatlar və eyniləşdirmə prosesi davam edir.

Daha əvvəl Ermənistanın Müdafiə Nazirliyi Qarabağ müharibəsində ölkənin insan itkisinin sayının az olduğunu iddia edib. Lakin Səhiyyə Nazirliyi bununla Müdafiə Nazirliyinin iddialarını təkzib etdi.

Müharibədə itkin düşən erməni döyüşçülərin də xeyli sayda olduğunu nəzərə alsaq, düşmənin insan itkisinin qat-qat çox olduğu məlum olur.