Hər kəs övlad sahibi olmaq istəyir, arzular qurur və sairə. Lakin valideyn adının məsuliyyəti bəzilərinin çiyinlərinə ağır gəlir.

Lənkəranda baş verən hadisə bunun əyani nümunəsidir. Liman şəhərində 7 günlük körpə karton qutuda küçəyə atılıb. Balaca qız uşağı hazırda həkimlərin nəzarəti altındadır.

7 günlük balaca Lənkəran rayonu, Liman şəhəri, Mirzə Ələkbər Sabir küçəsində atılmış vəziyyətdə tapılıb. Səhər saatlarında heyvanlarını örüşə aparmaq üçün evdən çıxan Camal Kazımov dəmir yol xəttinin yaxınlığındakı yaşayış olmayan həyətin qarşısında bağlama görüb.

O, evdə yaşayış olmadığını bildiyi üçün qapı ağzına qoyulan karton qutu onun diqqətini çəkib. Qutunu açanda isə çaş-baş qalıb.

Körpəni evə gətirən Camal Kazımov atılmış uşaqla bağlı Daxili İşlər Nazirliyinin "102" zəng xidmətinə məlumat verib. Bundan sonra körpə polis əməkdaşlarının iştirakı ilə Lənkəran Rayon Mərkəzi Xəstəxanasının doğum şöbəsinə təhvil verilib.

Xəstəxanadan körpənin bir həftə əvvəl doğulan qız uşağı olduğu bildirilib. Həkimlər tərəfindən körpənin vizual müayinəsi aparılıb və vəziyyəti orta ağır qiymətləndirilib. Xəstəxanaya daxil olanda temperaturu aşağı olduğundan o, küvezə yerləşdirilib.

Hazırda körpənin temperaturu normallaşıb. İlkin müayinələr zamanı körpədə hər hansı bir travma aşkar edilməyib.

Polis indi həmin uşağın valideynlərini axtarır.