Bakıda daha bir qoçu sürücü peyda olub.

Sürücülərdən biri başına gələn hadisənin videosunu Avtosfer.az-a göndərib.

Belə ki, o, aprelin 26-ı Qaraçuxur qəsəbəsi Zığ-Mədən yolunda qaydalar çərçivəsində hərəkət edən zaman arxadan "Mercedes" markalı 99-RZ-878 qeydiyyat nişanlı avtomobilin sürücüsü yüksək sürətlə hərəkət edərək ondan yol istəyib. Qarşıdakı sürücünün yol vermədiyini görən "Mercedes"in sürücüsü səs siqnalı verərək onun qarşısını kəsib. O, daha sonra avtomobildən düşüb sürücünün yanına gələrək nalayiq söyüşlər söyməyə başlayıb. Üstəlik sürücünün üzündən vuraraq hadisə yerindən qaçmağa başlayıb.

Görüntünü qeydə alan sürücü bu barədə DİN-in 102 qaynar xəttinə şikayət edib. Hüquqları pozulmuş sürücü Avtosfer.az saytı vasitəsi ilə Daxili İşləri Nazirliyinin rəhbərliyindən həmin sürücünün ciddi şəkildə cəzalandırılmasını xahiş edib.

Artıq sosial şəbəkələrdə yayılan sözügedən görünlərlə bağlı Bakı Şəhər Baş Polis İdarəsinin (BDYPİ) Dövlət Yol Polisi (DYP) İdarəsi paytaxt ərazisində sürücülər arasında baş verən hadisəyə münasibət bildirib. İdarənin şöbə rəisi, polis polkovniki Vaqif Əsədov "Report"un sorğusuna cavab olaraq deyib ki, vətəndaş hadisə ilə bağlı aidiyyəti üzrə zəng edərək məlumat verib, faktla bağlı araşdırmalara başlanılıb.