Qazaxıstanın Xəzərsahili Manqistau vilayətində təlimlər zamanı həlak olan hərbçilərin sayı 12-yə çatıb.

Bu barədə Manqistau vilayəti akimatının (administrasiyasının) yaydığı məlumatda bildirilib.

“Dəqiqləşdirilmiş məlumata görə, təlim döyüş tapşırığının icrası zamanı meteoroloji şəraitin kəskin pisləşməsi və küləyin güclənməsi səbəbindən 17 nəfər dənizə sürüklənib. Onlardan 12-si həlak olub, 3 nəfəri xilas edilib. Daha 2 hərbçinin axtarışları davam etdirilir”, - məlumatda qeyd olunub.

Qeyd edək ki, bundan əvvəl Qazaxıstan Müdafiə Nazirliyi ölkə Hərbi Dəniz Qüvvələrinin təlimləri zamanı 19 hərbçinin dənizə sürükləndiyini, 3 nəfərin xilas edildiyini, 9 hərbçinin isə həlak olduğunu bildirmişdi.

XXX

12:58

Manqistau vilayətində, Xəzər dənizi sahilində Qazaxıstan Hərbi Dəniz Qüvvələrinin təlimləri zamanı doqquz hərbi qulluqçu həlak olub.

Qaziler.az xəbər verir ki, bu barədə NUR.KZ “Telegram” kanalı məlumat yayıb.

Respublikanın Müdafiə Nazirliyinin məlumatına görə, hadisə Aktau şəhərindən 43 km məsafədə baş verib. Havanın kəskin pisləşməsi və küləyin güclənməsi səbəbindən hərbçilər dənizə sovrulublar.

İlkin məlumatlara görə, 19 hərbi qulluqçu açıq dənizdə qalıb, doqquz nəfər həlak olub, daha üç nəfəri isə xilas etmək mümkün olub. Onlardan biri xəstəxanaya yerləşdirilib. Müdafiə Nazirliyi əlavə edib ki, digər şəxslərin axtarışları davam edir.

QAZİLER.AZ