Fevralın 5-də neftin qiyməti bir il ərzində ən yüksək həddinə çatıb. Reuters gentliyi yazır ki, neftin bir barrelinin qiymətinin 60 dollara çatmasına iqtisadi dirçəlişə olan ümidlərin artması, habelə OPEC qrupu və onun müttəfiqlərinin hasilat ixtisarını davam etdirməsi səbəb olub.

Neftin qiymətinə başqa amillər da təsir göstərib. Belə ki, ABŞ-ın qiymətli kağızlar bazarında rekord göstəricilər qeydə alınıb. Bundan başqa iş yerlərinə dair hesabat bu sahənin stabilləşdiyini göstərir. ABŞ-da işsizliyin bir qədər azalması yanvarın əvvəllərində qeydə alınıb. Bununla belə hökumətin bu sahəyə əlavə xilas vəsaiti buraxmasına ehtiyac var. ABŞ prezidenti Cozef Bayden fevralın 5-də 1.9 milyard dollarlıq koronavirus yardım paketini elan edib.

Fevralın 5-də Brent markasından olan neftin bir barrelinin qiyməti 72 sent və ya 1.2 faiz qalxaraq 59.56 dollar olub. ABŞ neftinin qiyməti 1.4 faiz və 76 sent qalxıb və hazırda bir barrel üçün 56.99 dollardır.

Nyu Yorkdakı OANDA firmasından neft təhlilçisi Edvard Moya deyib ki, hazırda Brent nefti bir barrel üçün 60 dollar səviyyəsində qərarlaşmağa çalışır.O bildirib ki, Brent neftinin qiyməti bu həftə ərzində 6 faiz qalxıb. Hazırda Azərbaycanın “Azeri Light” neftinin bir barrelinin qiyməti 61.24 dollardır.

Reuters yazır ki, dünya boyunca peyvəndləmə kampaniyalarının başlanması karantinin yumşalacağına və yanacağa tələbatın artacağına ümidlər yaradır.Bununla belə hətta OPEC kimi nikbinlər də neftə tələbatın 2022-ci ilədək pandemiyadan əvvəlki səviyyəyə çatacağına inanmırlar. “Rystad Energy” firmasının neft bazarları üzrə direktoru Byornar Tonhaugen deyib ki, neft qiymətlərinin dirçəlməsinə ən böyük təkan Səudiyyə Ərəbistanından gəlib.

Səudiyyənin Aramco şirkəti “Arab Light” markasının şimal-qərbi Avropadakı qiymətini bir barrel üçün 1.40 dollar qaldırıb. Bu ona işarə edir ki, Səudiyyə neft bazarındakı vəziyyətə inamla baxır.

Qeyd edək ki, neftin qiymətinin son həftələrdə əhəmiyyətli ölçülərdə qalxması Azərbaycan üçün də 2021-ci ildə iqtisadi dirçəliş perspektivlərini artırır. Pandemiyaya ilə əlaqədar Azərbaycanda da iqtisadi geriləmə yaşanıb və indi ölkənin əsas ixrac məhsulunun qiymətinin artması heç şübhəsiz ki, ÜDM-in artımına da səbəb olacaq. Eyni zamanda ölkənin valyuta ehtiyatları daha da artacaq, mümkündür ki, neftin qiymətinin sonrakı bahalaşması Azərbaycan hökumətini il ərzində büdcəyə yenidən baxmağa, məsələn, işğaldan azad edilmiş ərazilərin bərpasına daha çox vəsait yönəltməyə sövq edə bilər. Çünki bərpa işlərinə ayrılan əlavə vəsait həm də ümumi iqtisadi artıma təkan verən amil olacaq.

Virtualaz.org