“Deyə bilərlər ki, neftin qiyməti 29 dollardır, amma heç bir dəyişiklik yoxdur. Burada söhbət bir və ya bir neçə gündən getmir. Burada neftin qiymətinin uzunmüddətli aşağı səviyyədə olmasından gedir. Tutaq ki, neftin qiyməti 1 il belə olarsa, manatın məzənnəsini saxlamaq olarmı?”

Pravda.az-ın xəbərinə görə, bunu iqtisadçı ekspert Samir Əliyev deyib.

“Hökumət manatın məzənnəsinin aşağı düşməsində maraqlı deyil, valyuta ehtiyatlarının müəyyən bir hissəsini xərcləmək yolu ilə olsa da, manatın məzənnəsini saxlamağı düşünür. Amma nə qədər gözləyəcək? Əsas sual budur. 2015-ci ildə Mərkəzi Bank 1 ilə 11 milyard itirdi. Bu dəfə itki olacaqsa, daha az olacaq. Amma hər bir halda neftin qiyməti 40 dollardan aşağı düşürsə, mənfi nəticələrə gətirib çıxara bilər. Yəqin ki, hökumət gözləyir. Düşünmürəm, neftin qiyməti uzun müddət bu səviyyədə qala bilər, yəni artacağı gözlənilir. Amma qiymətin 60 dollar olacağını da gözləmirəm. Manatı ucuzlaşdırmaq hökumətə sərf etmir. Amma gələcəkdə manat vəziyyətdən asılı olaraq getdikcə ucuzlaşacaq” – S.Əliyev qeyd edib.