Bakıda Müstəqil Dövlətlər Birliyinin (MDB) iştirakçısı olan dövlətlərin Gömrük Xidməti Rəhbərləri Şurasının 65-ci iclası keçirilib.
QAZİLƏR.AZ “APA-Economics”-ə istinadən bildirir ki, iclasda Azərbaycan, Belarus, Qazaxıstan, Qırğızıstan, Moldova, Rusiya, Tacikistan, Özbəkistan gömrük xidmətlərinin, həmçinin MDB İcraçı Komitəsinin nümayəndələri iştirak ediblər.
İclasda mövcud gömrük qanunvericiliyi və onun tətbiqi praktikasının təkmilləşdirilməsinə dair bir sıra aktual məsələlər müzakirə olunub. Şura bir sıra sazişlərin müddəalarının dəyişdirilməsinə yönəlmiş sənədləri təsdiq edib. Xüsusilə, gömrük məsələlərində əməkdaşlıq və qarşılıqlı yardım haqqında 1994-cü il sazişinə düzəlişlər qəbul edilib.
Bu düzəlişlər gömrük xidmətlərinin müraciətlərinə əsasən informasiya mübadiləsinin təşkilinə aiddir. Bu cür mübadilə mərkəzi gömrük orqanları arasında olduğu kimi, bilavasitə ərazi gömrük orqanları arasında da mümkün olacaq. Azad ticarət zonasının yaradılması haqqında 1994-cü il 15 aprel sazişinin bir sıra MDB iştirakçısı olan dövlətlər üçün qüvvədən düşməsi ilə əlaqədar olaraq, azad ticarət zonasının yaradılması haqqında sazişin iştirakçısı olan dövlətlər arasında hərəkət edən malların gömrük qeydiyyatı və gömrük nəzarətinin qaydaları haqqında 1999-cu il 8 oktyabr sazişinə və MDB iştirakçısı olan dövlətlərin ərazisində tranzit qaydaları haqqında 1999-cu il 4 iyun sazişinə dəyişikliklər edilməsi haqqında protokol layihələri təsdiq olunub.
Şuranın qərarı ilə, MDB gömrük orqanlarında risklərin idarə olunması sisteminin idarə olunması, reallaşdırılması və daha da təkmilləşdirilməsinə vahid yanaşmaların bərqərar edilməsi məqsədilə MDB iştirakçısı olan dövlətlərin gömrük orqanlarının fəaliyyətində risklərin idarə olunması sisteminin tətbiqinin nümunəvi qaydası təsdiq edilib.
Sənəddə risklərin idarə olunması sisteminin əsas məqsədləri, vəzifələri, quruluş prinsipləri, risk təhlilinin obyektləri, risklərin idarə olunması sisteminin elementləri, risklərin minimallaşdırılması mexanizmi, həmçinin malların buraxılışından əvvəl və sonra risk profilləri və indikatorları layihəsinin hazırlanmasında və nəzərdən keçirilməsində gömrük orqanlarının vəzifəli şəxslərinin fəaliyyət qaydası müəyyən olunub.
MDB iştirakçısı olan dövlətlərin gömrük xidməti rəhbərləri Malların təsviri və kodlaşdırılmasının uyğunlaşdırma sisteminin 6-cı nəşrinə verilmiş İzahların rusdilli versiyasının I və II cildlərini təsdiq edib, həmin İzahların rusdilli versiyasının III-V cildlərinin hazırlanması üzrə işin davam etdirilməsi ilə bağlı tapşırıqlar veriblər. Eyni zamanda, MDB-nin xarici iqtisadi fəaliyyətinin vahid Əmtəə nomenklaturasına dəyişikliklər də təsdiq olunub. MDB iştirakçısı olan dövlətlərin Gömrük Xidməti Rəhbərləri Şurasının növbəti iclasının 2017-ci ilin IV rübündə Qırğızıstanda keçirilməsi qərara alınıb.
Sonda gömrük əməkdaşlığı ilə bağlı MDB iştirakçısı olan dövlətlərin Gömrük Xidməti Rəhbərləri mükafatlandırılıb. Daha sonra bir neçə sənədlərin imzalanma mərasimi baş tutub.
