Milli Məclisin İqtisadi siyasət komitəsinin iclasında 2013-cü il yanvarın 1-dək və 2013-cü il yanvarın 1-dən (Şəhərsalma və Tikinti Məcəlləsi qüvvəyə mindikdən) sonra inşa edilmiş tikililərin sənədləşməsi ilə bağlı məsələ müzakirəyə çıxarılıb.

Komitə sədri Ziyad Səmədzadənin sədrliyi ilə keçirilən iclasda bildirilib ki, Mülki Məcəllənin 139-cu maddəsinə edilən əlavə və dəyişikliyə əsasən 2013-cü il yanvarın 1-dək inşa edilən, hündürlüyü 12 metrədək olan yaşayış evlərinə münasibətdə - torpaq sahəsi üzərində mülkiyyət, icarə və ya istifadə hüququnu təsdiq edən sənəd, müvafiq icra hakimiyyəti orqanı ilə razılaşdırılmış layihə və ya yaşayış evinin istismarına qəbul aktı olmalıdır. Layihədə bildirilir ki, həmin yaşayış binaları və çoxmənzilli binalara, qeyri-yaşayış binalarına müvafiq icra hakimiyyəti orqanının tikilinin inşa edilməsinə icazə barədə qərarı, istismarına qəbul aktı verilməlidir.

Layihəyə əsasən 2013-cü il yanvarın 1-dən sonra inşa edilən tikililərdə isə tikintisinə icazə tələb olunun tikinti obyektləri üçün - torpaq sahəsi üzərində mülkiyyət, icarə və ya istifadə hüququnu təsdiq edən sənəd, tikintiyə icazə verilməsi barədə qərar, tikinti layihəsinin memarlıq-planlaşdırma bölməsi, tikinti obyektinin istismarına icazə verilir. Bildirilib ki, məlumatlandırma icraatının tətbiq edildiyi yaşayış evləri üçün - torpaq sahəsi üzərində mülkiyyət, icarə və ya istifadə hüququnu təsdiq edən sənəd, tikinti layihəsinin memarlıq-planlaşdırma bölməsi, sifarişçi tərəfindən tikinti başa çatdıqdan sonra müvafiq icra hakimiyyəti orqanına məlumat verilməsini təsdiq edən sənəd olmalıdır.
Sənəddə qeyd edilib ki, 2009-cu il oktyabrın 1-dək dövlət və ya ictimai mənzil fondundan yaşayış sahəsinin verilməsinə dair müvafiq icra hakimiyyəti orqanının sərəncamı, order və ya mənzil kirayəsi müqaviləsi olmalıdır. 2006-cı il iyulun 6-dan 2009-cu il iyunun 24-dək müvafiq icra hakimiyyəti orqanı tərəfindən daşınmaz əmlaka dair verilmiş şəhadətnamələr tələb edilir.
Layihə Milli Məclisin plenar iclasına tövsiyə olunub.
Mənbə: APA.az