Rusiya Nazirlər Kabineti 2016-cı il yanvarın 1-dən etibarən Rusiyaya idxalı qadağan olunan Türkiyə məhsullarının siyahısını təsdiqləyib. APA-nın RBK-ya istinadən verdiyi məlumata görə, Türkiyədə yetişdirilən tərəvəzlərdən xiyar, pomidor, soğan, rəngli kələm və brokolinin Rusiyaya gətirilməsi qadağan edilib.

Meyvələrin “qara siyahı”sında sitruslar (portağal, mandarin və onların hibridləri), alma, armud, ərik, şaftalı, nektarin, gavalı, göyəm, üzüm və çiyələk var.

Türkiyədə istehsal olunan heyvandarlıq məhsullarından toyuq və hind toyuğunun, onlardan hazırlanan məhsulların, həmçinin duz və qərənfilin idxalı da yasaqlanır.

Bəzi məhsullar, məsələn, limon, iri buynuzlu heyvanların əti, balıq və süd məhsulları isə siyahıya salınmayıb.

Qeyd edək ki, Rusiya prezidenti Vladimir Putin bir neçə gün əvvəl Türkiyə qarşı xüsusi iqtisadi tədbirlər haqqında fərman imzalayıb.