Manatın dövretmə sürəti azalıb. Azərbaycan Mərkəzi Bankının (AMB) məlumatına görə, bu ilin martın 1-nə Azərbaycanın milli valyutası - manatın dövretmə sürəti 3,23 bənd təşkil edib. Bu, fevralın 1-i ilə müqayisədə 0,03 bənd az, ilin əvvəli ilə müqayisədə 0,22 bənd az, ötən il martın 1-nə nisbətən isə 0,02 bənd azdır. Manatın dövretmə sürətinin son 17 il ərzində ən aşağı həddi 2015-ci ilin yanvar ayının yekununda, yəni son illərin ilk devalvasiyası ərəfəsində qeydə alınıb və 2,68 bənd təşkil edib. Bu göstəricinin ən yüksək həddi isə 2005-ci ildə (15,72 bənd) qeydə alınıb. Bəs azalmaya səbəb nədir?
QAZİLER.AZ xəbər verir ki, Moderator.az-a danışan iqtisadçı ekspert Günay Hüseynova bildirib ki, zaman-zaman müəyyən vaxtlarda ölkə olaraq iqtisadi çətinliklərimiz olub, hətta son anda bir növ devalvasiyanın kandarından yan keçdik:
“Təəssüf ki, hazırda iqtisadiyyatın müxtəlif sahələri üçün çox yaxşı bir şey demək mümkün deyil. Devalvasiyanın bir addımlığındayıq, desək daha doğru olar. Daha öncəki proqnozlarımız zamanı neft bu qədər kəskin düşməmişdi. Bununla yanaşı, Mərkəzi Bankın yeni qərarı, likvidlik, kredit portfelinin, bankların xalis mənfəətinin aşağı düşməsi bizi bir növ devalvasiyaya daha da yaxınlaşdırır. Mərkəzi Bankın qərarına əsasən bundan sonra hərraclarda banklara nə qədər dollar satıldığı açıqlanmayacaq. Axı, səbəb nə ola bilər ki? Açıqlansa, bunu sadəcə iqtisadi ekspertlər şərh edə bilər. Bu kimi hallar sadə vətəndaşın bir o qədər də anlayacağı qərar deyil".
İqtisadçı əlavə edib ki, manatın dövretmə sürətinin birdən-birə düşməsi sıravi vətəndaşla əlaqədar deyil, bu, investorların iqtisadi durğunluq dövründə vəsaiti əllərində saxlamaqlarından qaynaqlanır:
“Tikinti sektoru illər əvvəl gəlirli hesab olunurdu. İşdən anlayan-anlamayan, imkanı olan şəxslər bu sahəyə yönəlirdi. İndi isə əksər binalar boşdur, qiymət baha olduğu üçün alan yoxdur. Banklar krediti, ipotekanı da el dili ilə desək, "hər adama vermirlər". İqtisadi canlanma yoxdur ki, vətəndaş mənzil alsın. İnvestorlar da əlindəki vəsaiti dövriyyəyə buraxmır, çünki hələ yatırdığı sahədən istədiyi məbləği geri ala bilməyib. Valyutanı tarazlamaq üçün ya müəyyən sektorlar özəlləşməyə getməlidir, ya da xarici investorlar cəlb olunmalıdır”.
G. Hüseynova vurğulayıb ki, müəyyən dövrlərdə dünya ölkələrində olduğu kimi, yerli iqtisadiyyat da müxtəlif çətinliklərlə üzləşir:
“Dövlətimiz vətəndaşların sosial rifahı naminə, devalvasiyadan minimum da olsa vətəndaşların zərərə uğramaması üçün lazımi iqtisadi tədbirləri görür. Dünən Cənubi Qaz Dəhlizi Məşvərət Şurasının 11-ci iclasının keçirilməsi buna əyani sübutdur. Daha çox dövlətin cəlb olunması, ixrac payımızın yüksəlməsi, xarici valyuta axını deməkdir. Bu da öz növbəsində iqtisadiyyatımız üçün dəstək xarakteri daşıyır".
