Xalq artisiti Məleykə Əsədova aktyor həmkarı Ramiz Məlikə qarşı qaldırdığı iddia üzrə Nəsimi Rayon Məhkəməsinin qəbul etdiyi qərardan apellyasiya şikayəti verəcək.

Bu barədə AzVision.az-a M.Əsədovanın vəkili Tağı Hüseynov məlumat verib.

“Məleykə xanım hazırda ölkədə yoxdur. Buna görə məhkəmədən sonra mətbuata geniş açıqlama ilə çıxa bilmədim. Aktrisa vətənə geri qayıtdıqdan sonra apellyasiya şikayəti veriləcək” – vəkil deyib.

Qeyd edək ki, ötən gün Nəsimi Rayon Məhkəməsində xalq artisti Məleykə Əsədovanın xalq artisti Ramiz Məlikə qarşı və R.Məlikin ona qarşı iddiası üzrə məhkəmə iclası davam etdirilib. Hakim Natavan Tağıyevanın sədrliyi ilə keçirilən prosesdə qərar elan olunub. Qərara əsasən, hər iki iddia təmin edilməyib.

Xatırladaq ki, M.Əsədova həmkarı R.Məlikin onun şərəf və ləyaqətini təhqir etdiyini iddia edib. O, məhkəməyə müraciət edərək həmkarından 200 min manat məbləğində təzminat istəyib. R.Məlikin vəkili Türkel Süleymanlı məhkəmədə qarşılıqlı iddia qaldırıb. O, M.Əsədovanın müvəkkilini təhqir etdiyini və buna görə 300 min manatlıq iddia qaldırdıqlarını söyləyib.