Mayın 6-da Azərbaycan Dillər Universitetində (ADU) “Əliağa Vahidin poetik irsi” mövzusunda ədəbi-bədii tədbir keçirilib.

ADU-dan AZƏRTAC-a bildiriblər ki, “Əliağa Vahidin 120 illik yubileyinin keçirilməsi haqqında” Prezident İlham Əliyevin 2015-ci il 18 mart tarixli Sərəncamına əsasən keçirilən tədbirdə əvvəlcə qəzəlxan şairin yaradıcılığına həsr olunan videoçarx göstərilib.

Universitetin Azərbaycan dili və ədəbiyyatı kafedrasının dosenti Aytac Zeynalova Ə.Vahidin Azərbaycan poeziyasında görkəmli və istedadlı şəxsiyyət olduğunu söyləyib. Şairin dərin mənalı poeziyasından danışan A.Zeynalova Ə.Vahidin məhəbbət mövzularında qələmə aldığı şeirlərindən söz açıb.

Tədbirdə təqdimatlarla çıxış edən tələbələr şairin yaradıcılığına nəzər salıb, onun əsərləri, toxunduğu mövzular, qəzəlləri barədə məlumat veriblər. Ə.Vahidin satirik şeirlərində ictimai nöqsanları, mövhumatı, zülm və haqsızlığı ifşa etdiyi bildirilib.

Ədəbi-bədii gecədə “Əliağa Vahid yaradıcılığına Nəsimi və Füzulinin bədii təsiri” mövzusuna toxunulub, şairə həsr olunan səhnəcik təqdim olunub. Həmçinin, qəzəlxanın şeir və qəzəllərindən nümunələr, şairin öz səsi ilə lentə alınmış şeirləri səsləndirilib.