Səməd Vurğun adına Sumqayıt şəhər Mərkəzi Kitabxanasında Süleyman Hüseynovun müəllifi olduğu “AND” romanının təqdimatı və imza günü keçirilib. Tədbirdə yazarın qələm dostları iştirak ediblər.

AZƏRTAC xəbər verir ki, respublikanın Əməkdar jurnalistləri Eyruz Məmmədov və Rafiq Oday, filologiya elmləri doktoru, ədəbi tənqidçi Vaqif Yusifli, “Kaspi” qəzetinin poeziya şöbəsinin redaktoru Dayandur Sevgin, “Ulduz” jurnalının məsul işçisi, şairə Fərqanə Mehdiyeva, Dövlət mükafatı laureatı, Əməkdar Mühəndis Təbrik Quliyev və digərləri çıxış edərək, S.Hüseynovun yaradıcılığına nəzər salıb, “AND” romanı haqqında fikirlərini bölüşüblər.

Bildirilib ki, bu roman vətənpərvərlik mövzusunda yazılıb, Qarabağ müharibəsindən bəhs edir. Eyni zamanda sevgi, millətlərarası münasibətlər, daxili və xarıcı siyasət məsələləri romanda əksini tapıb.

Sonra yazar sualları cavablandırıb, tədbir iştirakçıları üçün kitabını imzalayıb.