Bu gün ədəbiyyat adamları xalq şairi Vaqif Səmədoğlunun məzarını ziyarət edib. Axar.az xəbər verir ki, xalq şairi Fikrət Qoca, xalq yazıçıları Anar və Çingiz Abdullayev, şair Ramiz Rövşən, xalq artisti Fəxrəddin Manafov, aparıcı Nərgiz Cəlilova və başqa ədəbiyyat adamları Fəxri Xiyabana gələrək Vaqif Səmədoğlunun məzarına baş çəkib, qəbri üstə gül dəstəsi qoyublar.

Xalq yazıçısı Anar mərhum xalq şairi, dostu Vaqif Səmədoğlu haqda danışaraq, onun əvəzsiz şəxsiyyət olduğunu bildirdi:

“Vaqifsiz bizə çox çətindir, onu çox istəyirdik. Vaqif üçün çox darıxırıq. O, həqiqətən böyük ədəbiyyat adamı idi. Fevral ayının 2-si Səməd Vurğunun ev muzeyində onunla bağlı tədbir, poeziya gecəsi keçiriləcək”.

Xalq yazıçısı Çingiz Abdullayev Vaqif Səmədoğlunun ədəbiyyata bağlı bir insan olduğunu dedi:

“Onun vəfatından bir il keçib. Vaqif sözün əsl mənasında gözəl insan idi. Vaqif Səmədoğlu da, qardaşı Yusif Səmədoğlu da xalq şairi Səməd Vurğunun layiqli davamçıları idilər. İki il bundan əvvəl ağır vəziyyətdə olanda ondan xahiş etdik ki, qurultaya gəlməsin. Buna baxmayaraq, gəldi, çıxış da elədi. Vaqif ədəbiyyata bu qədər bağlı insan idi”.

Xatırladaq ki, xalq şairi Vaqif Səmədoğlu 2015-ci il yanvarın 28-də xərçəng xəstəliyindən vəfat edib.